Llueu de la renuncia de Marta Mori, l’Academia zarró ayeri’l correspondiente procesu electoral pa facer definitiva la sustitución nel cargu. Asina, d’alcuerdu colos artículos 19.3 y 19.4 de los sos estatutos, el plenariu de l’ALLA llevó a votación la única candidatura presentada. D’esti xeitu, l’académicu xixonés David Guardado foi escoyíu nel cargu de
vicepresidente, inxiriéndose nel organigrama de la Xunta de Gobiernu que va tar vixente hasta xunu del añu 2025.
David Guardado Diez (Xixón, 1970) ye llicenciáu en Filoloxía Inglesa, diplomáu n’Estudios Avanzaos en Filoloxía y Especialista Universitariu en Llingua Asturiana. Pioneru na presencia del asturianu n’internet, Guardado ye autor de dellos artículos y del ensayu «Llingua estándar y normalización llingüística» amás de la so última obra, «Nunca vencida».
