El Muséu del Pueblu d’Asturies axunta na so colección el más numberosu y ricu conxuntu de fotografíes de toles nueses instituciones. Los sos fondos cunten con un ampliu testimoniu de tolos estremos de la vida del país, desque en 1839 se diera a conocer esti nuevu mediu hasta güei.

La fotografía tresmanó la llectura de la realidá, que dende entós se fixo documentalmente verídica. Más allá del llabor d’estudiu, que’l so exe orixinal yera la semeya, los profesionales fueron abriendo los sos intereses escontra otres temes. L’asuntu preferente, como nun podía ser otra manera, foi la so redolada, el paisaxe cambiante de ciudaes y villes que dende mediaos del sieglu XIX aceleren el so progresu con un nuevu urbanismu y una nueva arquitectura; un progresu que caltien los edificios y espacios históricos, o que los destrúi n’ares del desenvolvimientu naguáu. D’esi paisaxe en tresformamientu lentu y constante ye bon exemplu Avilés, qu’a lo llargo d’un sieglu supo combinar el caltenimientu de la so clásica identidá histórica coles buelgues ineludibles d’una modernidá ansiosa.

Ensin esa percepción d’una redolada pervalible del que fixeron testimoniu na so obra les socesives xeneraciones de fotógrafos avilesinos, la nuesa conocencia d’esa villa, qu’avanza a ciudá, sería incompletu o fallíu. La imaxe como documentu va tener el valor de refrendar en tolos sos estremos la persistencia d’una realidá nun precisu momentu, pero tamién va ser una manera d’espresión artística que va emplegar otros medios, otres técniques, pa interpretar, en confluencia cola pintura y el grabáu, una visión propia d’esi Avilés que la so singular identidá eclosiona nos años venti y trenta del sieglu XX.

Con esta esposición, que presenta una selección de los fondos sobre Avilés na colección del Muséu del Pueblu d´Asturies, ye posible identificar la evolución de villa a ciudá, al traviés del llabor de los profesionales establecíos equí ente 1860 y 1937. Na esposición combinen los exemplos de diversos modelos de semeyes d’estudiu con un completu panorama de fotografíes que reflexen los cambeos na identidá urbana; una identidá que ta nel orixe y evolución d’un xéneru d’aceptación masiva como ye la tarxeta postal, qu’apurre’l más ricu repertoriu del Avilés nel tiempu.