La Conseyería de Derechos Sociales y Bienestar punxo a disposición de Salú la residencia de Llugones, perteneciente a la rede pública del ERA, por que pueda usase como dispositivu sanitariu de nivel 3 p’atender a persones infectaes por covid con sintomatoloxía leve, asintomáticas, contactos estrechos o persones que precisen curiaos que nun pueden ser aportaos nes sos cases.
El Sespa ta peracabando’l plan funcional pa atender a los pacientes nesti centru y dar asina respuesta al aumentu de casos rexistráu n’Asturies. “Punximos a disposición del Sespa esti centru porque entendemos qu’hai qu’optimizar recursos y dar respuesta a les situaciones estraordinaries como la que tamos viviendo, dando siempre prioridá a la salú de los asturianos y les asturianes”, aseguró la conseyera de Derechos Sociales y Bienestar, Melania Álvarez, na so visita a les instalaciones xunto cola xerente del ERA, Ana Suárez, y el director xeneral de Cuidaos, Humanización y Atención Sociosanitaria, Sergio Valles.
El Principáu invirtió 7,3 millones nesti nuevu centru, que dispón de 120 places residenciales (un 60% son habitaciones individuales y el restu, dobles) y va cuntar con una plantiya formada por 53 profesionales.
La residencia dispón d’una planta emisuétanu y distribúyese en trés volumes rectangulares de trés pisos caún que, xuníos al emisuétanu per un estremu, adquieren la forma d’un trébole de trés fueyes.
Nel emisuétanu allúgase l’aparcamientu, les instalaciones d’eletricidá y calefacción, l’almacén y los vestuarios. Na planta baxa, atópase l’accesu principal, la recepción, comedores, cafeteríes, sales de tar y de convivencia y servicios como peluquería, podoloxía, ximnasiu, fisioterapia, sala de cures y d’enfermería. A lo último, los dos pisos superiores destínense a les habitaciones.
Premiu Plomada de Plata
La Confederación Asturiana de la Construcción Asprocon reconoció col premiu Plomada de Plata la obra executada na fachada de la residencia de Llugones, na categoría de meyor fachada rehabilitada o de nueva construcción destinada a otros usos distintos a la vivienda.
El xuráu resaltó la combinación de les zones acristalaes protexíes de la radiación solar, que, a su vez, funcionan como espaciu de relación de les persones usuaries.
