En 1945 foi la primer vegada que se tien usao dos bombes atómiques nuna guerra. EE.XX. tiróles nes ciudaes xaponeses d’Hiroshima y Nagasaki matando a decenes de miles de persones en caúna d’elles, en cuestión de segundos. En 1970 fízose vixente’l Tratáu de Non Incrementu Nuclear (NPT) integráu por 190 estaos. L’oxetivu yera restrinxir la posesión d’armes nucleares. Cola esceición de los cinco estaos que que ficiern prebes nucleares enantes de 1967 y que son los miembros permanentes del Conseyu de Seguridá de la ONX: EE.XX., Reinu Xuníu, Francia, Xunión Soviética (güei Rusia) y China.
Anguaño son nueve los estaos que tienen bombes nucleares. Rusia, EE.XX., China, Francia, Reinu Xuníu, Paquistán, India, Israel y Corea del Norte. El 90% son de Rusia y EE.XX., anque ye mui peligrosu y esmolecedor que tengan esta triba d’armes dos estaos nos estremos ideolóxicos: Israel y Corea del Norte. Según el Centru pal Control y Non Incrementu d’Armes, calcúlase que los EE.XX. caltienen n’Europa 150 bombes nucleares nes sos bases aérees de Bélxica, Alemaña, Italia y Países Baxos, anque pue haber más. En 2018, el Comité de Drechos Humanos de les Naciones Xuníes afitó que l’amenaza o l’usu d’armes nucleares ye incompatible col drechu a la vida y pue constituyir un delitu según el drechu internacional.
Nel 2021 la ONX prohibió les armes nucleares per aciu’l Tratáu sobre la Prohibición de les Armes Nucleares (TPAN) robláu por 50 estaos, el númberu mínimu pa la implantación d’un tratáu. Según la ONX, les armes nucleares son les más peligroses del mundiu. Una sola pue
destruyir una ciudá entera, matar a millones de persones y poner en peligru el mediu natural y les vides de futures xeneraciones polos efectos a llargu plazu. Güei queden unes 22.000 y hebo más de 2.000 prebes nucleares.
Más de la metada de la población mundial vive n’estaos que tienen estes armes o son miembros d’aliances nucleares. Poro, afitóse’l 26 de setiembre como Día Internacional pal Desaniciu Total de les Armes Nucleares. Una prioridá pal compromisu del desarme y una oportunidá pa educar nes ventaxes d’esti pasu pal algame de la paz y la seguridá planetaries. El desarme nuclear ye una emerxencia yá que cualesquier erru nel usu d’estes armes pue desaniciar la vida na Tierra. Y les amenaces medren acaldía. Como dixo Gandhi “Nun hai camín pa la paz, la paz ye’l camín”.
