La Policía Nacional detuvo en Xixón a un alumnu de 18 años por acosar sexualmente a una profesora. La muyer denunció que llevaba meses recibiendo correos lletrónicos de delles cuentes faciéndo-y proposiciones sexuales, invitaciones pa cumplir fantasíes erótiques y axuntábense-y arquivos de vídeu con conteníu pornográfico d’adultos y de menores.
La profesora decidió poner l’asuntu en manes de la Policía al sospechar que podría tratase d’un alumnu. Dalgunes grabaciones taben feches n’aules del centru nel qu’impartía clases y incluyíen referencies a relaciones íntimes con un alumnu. Axentes de la Policía rastrexaron les cinco cuentes de corréu lletrónicu dende les que s’unviaron cerca de cien mensaxes. Concluyeron que tolos mensaxes fueron unviaos por un únicu usuariu que se conectaba dende’l mesmu equipu informáticu.
Estos datos permitieron identificar a l’autor, que resultó ser alumnu de la denunciante. Mientres siete meses unvió-y mensaxes «utilizando un llinguaxe ofensivu, bocayón y soez con pidimientos de semeyes íntimes y con proposiciones pa reproducir actos sexuales recoyíos nos vídeos que-y axuntó». L’autor, un mozu xixonés de 18 años, foi deteníu por axentes de la Comisaría de Xixón como presuntu autor d’un delitu d’acosu sexual.
