El sábadu 23 d’avientu, a partir de les 20:00 hores, na sala Tribeca d’Uviéu, Dixebra va despidir l’añu con un conciertu, pal que se pueden adquirir les entraes anticipaes -12 €- na plataforma woutick.es, o’l mesmu día en taquilla -15 €-.
Los avilesinos siguen presentando en directo l’ultimu trabayu que publicaron, el discu-llibru tituláu Ente la niebla, una obra multidisciplinar que tresciende l’aspectu musical pa convertise nun exerciciu de memoria colectiva alredor de la historia de les clases populares asturianes. Nesti sen, el volume inclúi testos d’historiadores, periodistes, escritores o antropólogos, que reflexonen sobre aspectos variaos de la historia de llucha del pueblu asturianu; mui importante tamién ye l’aspectu gráficu, con abondante material fotográficu y cola collaboración de dellos ilustradores asturianos que complementen caúna de les lletres de los cantares. Un total de venti composiciones faen parte d’Ente la niebla, faciendo un percorríu pel devenir de les clases trabayadores n’Asturies, tratando cuestiones como la emigración, la Revolución d’Ochobre, el Conseyu Soberanu, la represión, l’exiliu, los fugaos, la Fuelgona del 62, el resurdimientu del sindicalismu obreru o conflictos llaborales contemporáneos (Ike, sector naval, Duro Felguera, minería, siderurxa…). Musicalmente sigue l’estilu mestizu de la banda, nel que tienen cabida sones de calter rock, punk, reggae, ska, folk o funk, un amiestu variáu que ye marca de la casa. Trátase d’una obra complexa de calter conceptual, cola que Dixebra quier dexar constancia d’una historia que paga la pena conocer y ufiertar a les xeneraciones nueves tener accesu a ella.
El conciertu de Dixebra per estes feches ye yá una tradición nel calendariu musical asturianu, un eventu que bien de siguidores esperen añalmente, perespecialmente aquellos y aquelles que tán fuera y vuelven estos díes a Asturies, teniendo asina la oportunidá de ver a la banda en directo.
