Dos empreses asturianes fueron galardonaes nel programa Ances Open Innovation, que güei falló los sos premios. Les compañíes emerxentes (startups) Koinsys y Llaboratoriu Miomimético resultaron ganadores poles sos soluciones pa los retos plantegaos poles firmes Recalvi y HMY, respectivamente.
Ances Open Innovation, un programa de tracción al mercáu d’empreses innovadores, celebró la so cuarta edición gracies a l’Asociación Nacional de Centros Europeos d’Empreses ya Innovación y la coordinación de Cristina Fanjul, vicepresidenta de Ances y directora del Centru Européu d’Empreses ya Innovación (CEEI) Asturies.
La llista de ganadores diose a conocer mientres un eventu celebráu en Madrid, nel que participaron les 22 startups que llegaren a la final. Ente elles figuraben ocho asturianes: BYM Ingema, UpIntelligence, Ready to reload, Canonical Robots, Koinsys, Autecnia, Llaboratoriu Biomimético y Dyftec, que presentaron soluciones a los retos d’innovación llanzaos por Soltec, Repsol, Cinfa, Inael, Recalvi, HMY, Meisa y Mundiplan.
Koinsys apurrió propuestes al desafíu de Recalvi, que plantegaba desenvolver un procesu pa identificar mercancía y productos almacenaos. Pela so parte, Llaboratoriu Miomimético presentó pa la empresa HMY un plan basáu en soluciones d’economía circular a partir de borrafes orgániques.
Cada compañía recibe un premiu de 500 euros, pero la parte más importante del galardón ye la posibilidá de collaborar cola firma tractora pa la que se presenta la solución al so retu tecnolóxicu.
