Dupla vuelve a Asturies esta fin de selmana con Ixuxú Cultura

Dupla son dos chavales d’Agurain (Álava) que faen música urbana dende un entornu rural. Dientro de la so propuesta hai electrónica, rock, rap, reggaeton, pop…; baille, llucha y amor; y sobre manera actitú. Nun ye fácil etiquetar a esti dúu que tien dao más de 150 conciertos en tres años y que’l mes pasáu entamaron la so xira nueva en Xapón pa presentar el discu nuevu De Un Pueblo Llamado Agurain.

Tres de la bona acoyida que tuvieron l’añu pasáu n’Asturies, agora repiten visitando Lata de Zinc el vienres 15 a les 21.30h -en compañía de DJ La Güeriata- y La Traviesa el sábadu 16 a les 21.30h -xunto a DJ Avante’l Pueblu-. Estes dos cites tienen entrada llibre.