Total conviértese nel cuartu operador de gas y eletricidá del país n’adquiriendo a EDP una cartera de 2,5 millones de veceros residenciales. La compañía francesa fortalez la so posición na xeneración d’eletricidá y gas n’España cola alquisición a dos centrales de ciclu combináu con una capacidá de casi 850 megavatios.
La compañía gala entra nel mercáu residencial español como cuartu provisor de gas y eletricidá del país con cuotes del 12% y 6% respectivamente. La firma complementa la so futura producción d’eletricidá anovable con capacidaes de xeneración eléctrica flexible a partir de gas. «Esta operación va permitir a Total convertise nunu de los principales actores del mercáu enerxéticu. La nuesa ambición ye poder ufiertar a los consumidores una ufierta competitiva derivada de la nuesa producción, basándonos na esperiencia de Total en Francia y Bélxica», dixo Patrick Pouyanné, presidente y director xeneral de Total. «Gracies a esta alquisición, Total va suministrar a partir de 2021 gas y eletricidá a 8,5 millones de veceros n’Europa». L’oxetivu de la compañía francesa ye algamar más de 10 millones de veceros en 2025.»
La transacción alcordada con EDP en 515 millones d’euros ta suxeta a l’aprobación de les autoridaes pertinentes. Espérase que la operación se complete a finales de 2020. La cartera d’aprosimao 2,5 millones de contratos residenciales inclúi unos 2,1 millones de veceros en manos de EDP Comercializadora y unos 400.000 en manos de CHC.
Total ye un grupu multienerxéticu, que produz y suministra combustible, gas natural y eletricidá baxa en carbonu. La empresa tien presencia en más de 130 países y da trabayu a más de 100.000 persones.
