La Conseyería d’Educación esanició’l cupu d’almitíos nes pruebes escrites de certificación de llingua asturiana de los niveles avanzáu (C1) y entemediu (B2), al considerar que puede atender toles solicitúes presentaes. Esta decisión dexa simplificar el procedimientu de matriculación, qu’empieza’l próximu miércoles, 26 d’abril. Asina, yá nun va ser necesariu realizar una solicitú previa de places, tal que establez la convocatoria, que publica güei nel Boletín Oficial del Principáu (Bopa).
Mientres les primeres convocatories d’esti procedimientu, qu’empezó en 2020, estableciérase un cupu máximu de 600 participantes, el númberu máximu que podía xestionar. Nestos trés años, el volume d’inscripciones estabilizóse, polo que la conseyería decidió abrir directamente la inscripción.
El plazu d’inscripción va tar abiertu del 26 d’abril hasta’l 12 de mayu, dambos inclusive. Les persones interesaes en participar nes pruebes tendrán d’apurrir la documentación nos siguientes centros: IES Aramo, d’Uviéu; IES Calderón de la Barca, de Xixón; IES Carreño Miranda, d’Avilés, y IES Bernaldo de Quirós, de Mieres. Los llistaos provisionales d’almitíos van publicase’l 23 de mayu nel portal Educastur.
Los exames tanto del B2 como del C1 van empezar el sábadu 30 de setiembre, cola prueba escrita nuna see qu’entá ta por determinar. La parte oral va desenvolver a partir del 9 d’ochobre.
Dambes pruebes consten de cinco partes: comprensión de testos escritos, compresión de testos orales, producción y coproducción de testos escritos, producción y coproducción de testos orales, y mediación. Pa llograr el certificáu va ser necesariu llograr, siquier, una puntuación de 5 en caúna de les partes y un promediu de 6 ente toes.
Pa la evaluación de la prueba, Educación va constituyir tribunales qu’integraos por profesoráu funcionariu de carrera del cuerpu de Secundaria y llingüistes espertos en llingua asturiana.
