El Bancu de Tierres facilita la llegada d’una familia de seis persones a Ayande per aciu l’arrendamientu de finques rústiques
El Bancu de Tierres facilitó l’arrendamientu d’ocho finques nel conceyu d’Ayande, con una superficie total de 4,7 hectárees, a un matrimoniu d’orixe costarricense con cuatro fíos, que se tresllada dende Torrevieja pa establecese na población de Ferroy. La operación, realizada al traviés del programa d’arrendamientos de finques rústiques Arrendalia, dexó a la familia aportar a los terrenos, a una vivienda y una corte, lo que favorez el so asentamientu nel territoriu y la puesta en marcha del so proyectu de vida nel mediu rural.
El xerente del Bancu de Tierres, José Ramón Feito, visitó güei’l conceyu pa conocer de primer mano les circunstancies de la familia y les posibilidaes qu’ufierta esta operación. La iniciativa amuesa cómo la movilización de terrenos agrarios disponibles pue contribuyir a xenerar nueves oportunidaes nos conceyos rurales, especialmente nos qu’encaren problemes de despoblamientu. Nesti casu, la intermediación del Bancu de Tierres dexó conectar a un propietariu interesáu n’arrendar les sos finques con una familia que busca establecese n’Asturies.
L’alcuerdu facilita la llegada de seis nuevos habitantes a Ferroi, cuatro d’ellos menores d’edá, lo que supón una oportunidá pa reforzar la vida social de la localidá y contribuyir al caltenimientu de l’actividá y los servicios de la redolada rural.
El Bancu de Tierres desempeña un importante llabor nel desenvolvimientu rural con diferentes iniciatives empobinaes a facilitar l’accesu a la tierra, favorecer la continuidá de l’actividá agraria y promover l’asentamientu de población nel territoriu. Ente estes actuaciones destaca’l programa de sucesión d’esplotaciones, que yá dexó’l relevu de 13 persones. A esta iniciativa súmase’l programa d’arrendamientos de finques rústiques, que favorez l’usu de terrenos disponibles y facilita l’accesu a la tierra, asina como el programa de permutes de finques rústiques, empobináu a ameyorar la estructura y la viabilidá de les esplotaciones agraries.
Con estes ferramientes, el Principáu favorez l’actividá económica y les oportunidaes pa les nueves xeneraciones nel mediu rural, nel que la tierra, les esplotaciones y la población son elementos claves pa garantizar el so futuru.
