Na sablera L’Arbeyal, na Feria comunitaria Barriu Oeste, presentóse Xente Lab al entamu la seronda. Anque con un tiempu de branu que dexó ver el llabor de Mar de Niebla, ente otres entidaes, dende les 10 a les 19 hores del caberu sábadu de setiembre.
Con una programación fecha con actividades y actuaciones realizaes por entidaes de la fastera oeste de Xixón. Con al rodiu de 70 negocios collaboradores, 13 actuaciones variaes, dende la música al teatru. Con 9 talleres, 7 actuaciones y actividaes, feria d’asociaciones, música, baille, con ruleta de premios, sorteos ya hinchables de baldre y con una xinta comunitaria por 2 euros. Amás de la presentación de Xente Lab, una ferramienta dixital pa la participación, con encuestes, ya eso.
Mar de Niebla ye una fundación pola aición social, un proyeutu comunitariu de tresformación social. Trabayen la inclusión social, la inclusión sociollaboral, la neñez, l’adolescencia y la mocedá, el voluntariáu y la participación.
El desendolque social col acompañamientu a les persones preferentemente vulnerables, ensin ánimu llucrativu, asítiase en La Calzada (Xixón) dende fai 10 años.
L’amuesa realizada en L’Arbeyal espeya la capacidá de la sociedá civil d’organizase pa iguar ferramientes pa la meyora de les sos condiciones de vida.
El marafundiu de los conceyos del país coles banderes estatales n’Uviéu, los toros en Xixón, y tantes otres inversiones de duldosu envís pal bientar social, contrasta con estes iniciatives ciudadanes surdíes de la propia xente pa influyir nel territoriu nel qu’alita.
Les sociedaes collaboratives, cooperatives y de tresfondu social son d’altu valir p’afrontar estos tiempos de crisis que la sociedá del país nun xeneró pero que paga pol contestu internacional nel que ta enartada.
Les aidances personalizaes de mayor ésitu danse nesta triba d’entidaes dirixíes a texer la rede pa un mundiu más xustu, equilibráu y caltenible.
Que les instituciones sofiten estes feries comunitaries ye otru finxu p’afuntar haza una sociedá más equitativa na so pluralidá.
Hai futuru, porque hai xente con ganes pa ello. Como nel Barriu Oeste xixonés.
