El Centru Integráu de Formación Profesional de Comunicación, Imaxe y Soníu de Llangréu, CIFP CISLAN, presentó una nueva edición del so tradicional Concursu de Maquetes, qu’anguaño algama la so XIV edición. La presentación de candidatures va poder realizase dende güei mesmu y hasta el próximu 14 de payares. El certame ta dirixío a grupos o solistes del Principáu d’Asturies, de cualquier estilu musical, ensin trabayos discográficos editaos y/o ensin trabayos autofinanciados con fines comerciales. Podrán presentase hasta cuatro temas al traviés de la plataforma Soundcloud.
El primer premiu consiste na grabación d’una maqueta nos estudios del CIFP CISLAN, la realización d’una sesión fotográfica, la producción musical para una plataforma en streaming agospiada na páxina web del centru y la producción de dos conciertos en sales privaes o espacios públicos. Tamién va haber un premiu otorgáu pol públicu qu’asista al Concursu de Maquetes nel salón d’actos del CIFP CISLAN, consistente na producción y realización d’una sesión fotográfica. Tolos premios van cuntar cola participación del alumnáu del centru.
Les bases del concursu podrán consultase al traviés de la páxina web del CIFP CISLAN (www.cislan.es) y va cuntase con un xuráu integráu por profesionales del sector musical y de la comunidá educativa. Los grupos escoyíos van ser publicaos nes páxines de Facebook y Instagram del ‘XIV Concursu de Maquetes CISLAN’, presentando les sos semeyes y links
de los cantares. Los miembros del xuráu van escoyer a trés de los grupos preseleccionaos, finalistes que van presentar les sos temes en directu nun conciertu que se va celebrar el 22 d’avientu.
