La Conseyería de Cultura, Política Llingüística y Deporte promociona’l cine y el sector audiovisual con un estand propiu na 28ª edición del Festival de Cine de Málaga. Asturies va tar presente nel área industrial del eventu, el Málaga Festival Industry Zone (MAFIZ), que se celebra hasta’l 21 de marzu.
La delegación asturiana va tar formada por 23 profesionales y empreses a les que’l gobiernu asturianu facilitó la so presencia nel eventu. L’oxetivu del MAFIZ ye favorecer l’espardimientu y promoción de la industria cinematográfico d’Iberoamérica, según crear nueves redes de negociu al traviés de la plataforma Regional Film Hub, que sofita’l sector cinematográficu de les distintes comunidaes.
Dientro del MAFIZ celébrase tamién la 19ª edición del Spanish Screenings Content, nel que baxo la marca Cine d’Asturies, va presentase un catálogu de 14 proyectos financiaos pola conseyería en 2024 pa los que se busquen diverses aliances, como financiamientu, socios en coproducción o postproducción, distribución, vientes o presencia n’otros festivales.
Amás, dientro del Spanish Screenings Content y col sofitu de Cultura, va tener llugar la proyección de dos llargometraxes asturianos: Luna, de Pablo Casanueva, y Generación Xixón Sound, de Aure Roces.
Asturies yá cuntara con representación nes ediciones de 2022 y 2023 del Festival de Málaga de la mano d’Asturies Paraísu Natural Filme Commission, qu’allegó pa promocionar los recursos del Principáu como plató de rodaxe, según la so rede d’empreses y profesionales.
Per otru llau, Asturies tamién va tar presente nel Festival de Cine de Málaga col curtiumetraxe La Palmera, dirixíu por Maryam Harandi y distribuyíu por Llaboral Cinemateca. Trátase d’un documental de gran posu poético, que transciende los cánones del xéneru, nel que la realizadora afronta la so identidá, la so hestoria y el so futuru. Esti trabayu, que va competir na sección oficial de Curtiumetraxe Documental, yá s’alzó col Segundu Diamante de la sección oficial del Certame Nacional de Curtiumetraxes del Festival de Cine de Alcalá de Henares, Alcine 2024, y proxectóse en reconocíos certames como L’Alternativa de Barcelona o’l FICX, en Xixón.
Amás, la tercer edición del Málaga Short Corner, l’espaciu de MAFIZ habilitáu pa la promoción, espardimientu y distribución de los curtiumetraxes más recién y relevantes de la industria, inclúi la proyección del curtiu Una luz, de Diego Flórez, que forma parte del catálogu de distribución de Llaboral Cinemateca Cortos. Tamién va poder trate’l trabayu La diva, mi abuela y yo, de la cineasta asturiana Inés G. Aparicio.
