El cineasta madrilanu David Martín de los Santos visita esta selmana Llaboral Cinemateca pa presentar la so ópera prima, La vida era eso, una delicáu aproximamientu a la edá adulta nominada a dos Premios Goya (meyor director novel y meyor actriz) y que protagonicen les impresionantes Anna Castillo y Petra Martínez, que pola so interpretación de María recibió’l premiu a meyor actriz nel Festival de Sevilla y nos Premios Feroz. El Paraninfu de Llaboral Ciudá de la Cultura acueye’l sábadu 19 de febreru, a les 19:00 hores, la proyección d’esta película tres la cual el realizador va caltener un alcuentru-coloquiu col públicu asistente.

Llaboral Cinemateca ye l’espaciu dedicáu al sector creativu cinematográficu y audiovisual promovíu pola Conseyería de Cultura, Política Llingüística y Turismu, al traviés de Llaboral Ciudá de la Cultura. La programación cinematográfica ufiertada por Llaboral Cinemateca ta coordinada pol Festival Internacional de Cine de Xixón/Xixón.

En collechando un centenar de premios colos sos cuatro curtiumetraxes –Mañana no es otro día, En el hoyoLlévame a otro sitio y 23 de mayo-, David Martín de los Santos escribe y dirixe’l so primer llargometraxe de ficción, La vida era eso. El guion foi escoyíu nel programa Small is Biútiful, MadridCreaLab, La Ventana del Cine de Madrid, Meditalents y llogró’l sofitu a desenvolvimientu de la CAM, amás de ganar el premiu a Meyor Proyectu nel Festival Internacional de Almería y recibir la mención d’honor nel Premiu SGAE de Guion Julio Alejandro.

En La vida era eso, dos muyeres españoles de distintes xeneraciones coinciden na habitación d’un hospital en Bélxica. María (Petra Martínez) vive ellí dende va décades n’emigrando na so mocedá y Verónica (Anna Castillo) ye una moza acabante llegar en busca de les oportunidaes que nunca nun atopó n’España. Ente elles fórxase una peculiar amistá que va llevar a María a entamar un viaxe de vuelta al sur d’España con una insólita misión. Lo qu’empieza como un viaxe en busca de los raigaños de Verónica, va convertir nuna oportunidá pa romper cola rutina y cuestionase los principios nos que basó la so vida.