La Conseyería de Cultura, Política Llingüística y Turismu, al traviés de la so Dirección Xeneral de Política Llingüísitca, empezó yá la planificación de les publicaciones y actividaes de la 43 Selmana de les Lletres Asturianes, que va centrase nes actividaes artístiques nes que destacó Ígor Medio: el cómic y la música. L’artista xixonés, que morrió nun accidente de carretera nel 2006, cumpliría los 50 años nel 2022.
Dende l’añu 1980 celébrase cada mes de mayu la Selmana de les Lletres Asturianes, homenaxe públicu y institucional a la creación lliteraria en llingua asturiana que se foi configurando como un acontecimientu cultural de gran importancia y vitalidá na Asturies actual.
El programa d’actos col que se va rindir homenaxe’l próximu mayu a Ígor Medio va tar coordináu por Norman Fernández Tascón, que ye autor de delles monografíes sobre historieta, amás de comentarista y articulista sobre cómics y collaborador habitual de la Selmana Negra de Xixón y d’otros eventos sobre’l cómic asturianu, xunto col músicu y dibuxante de cómic Ruma Barbero de Diego, quien en 1991 fundó con Medio’l grupu de folk Felpeyu.
La Selmana de les Lletres Asturianes ye un eventu participativu nel que s’axuntan lo lliterario, lo festivo y lo institucional. A esta celebración entamada pol Gobiernu asturianu xúnense múltiples instituciones y participen de manera especial los centros educativos, les llibreríes, les editoriales, los escritores o los mesmos medios de comunicación.
