El plazu d’inscripción nes escueles infantiles de primer ciclu pal cursu 2020-2021 yá ta abiertu. Los padres van poder solicitar plaza, hasta’l 30 de xunu, pa menores de 3 años nacíos o que vayan nacer enantes del 1 de xineru de 2021. Les places tan acutaes pa persones que residan o qu’acrediten trabayar en Xixón.
Por mor de l’actual emerxencia sanitaria, les solicitúes han presentase preferentemente pel rexistru electrónicu o per corréu electrónicu. N’aquellos casos nos que nun seya posible tramitar la matrícula de forma telemática, va poder facese personalmente, pero con cita previa. Namás ye necesaria una inscripción por neñu na que s’indicarán dos escueles por orde de preferencia.
Los escolinos van distribuyíse n’unidaes en función de la so edá. Nun podrá haber más de ocho neños por unidá ente los menores de 1 añu, trece ente los de 1 a 2 años, y dieciocho ente los de 2 a 3 años. La xornada máxima que puen permanecer na escuela ye d’ocho hores diaries. Los centros ufierten xornada completa continuada con serviciu de comedor, dende les 9 de la mañana ampliable a les 7:30 hores con xustificante llaboral. La media xornada de tarde con merienda y de 13 a 17 hores. La dirección de los centros va valorar les solicitúes, dando prioridá a quien trabaye a xornada completa o cursen estudios oficiales de calter presencial n’horariu diurnu.
