El Conceyu de Xixón concedió nel Plenu d’Honores y Distinciones el títulu de Fíu Predilectu de la Villa de Xixón a títulu póstumu al abogáu, políticu y intelectual Francisco Prendes Quirós. Reconozse d’esta miente los sos ideales ilustraos que contribuyeron a desenvolver la so pasión política nel sentíu más noble, siempres a favor del bien xeneral y colectivu.
Tamién se fixo firme’l nomamientu del escritor chilenu Luis Sepúlveda, fináu’l pasáu 16 d’abril a los 70 años d’edá víctima del COVID-19, como Fíu Adoptivu de la Villa de Xixón pol so amor y enraigonamientu pol conceyu onde desenvolvió la so actividá lliteraria y la promoción d’iniciatives como’l Salón del Llibru Iberoamericanu que mientres 14 años reforzó los intercambios ente la penísula ibérica y el mundu cultural y lliterariu tresatlánticu.
Per otru llau, la Medaya d’Oru otorgóse al proyectu social ‘Una Ciudad pa todos’, reconociendo, asina, el so cuasi mediu sieglu de trabayu en favor de la integración social de colectivos y persones con un claru ideal de xusticia social. Na categoría de plata, concediéronse les medayes a José Antonio Rodríguez Canal, periodista de referencia y medaya al Méritu nel Trabayu en 2008; al xugador de balonmano Raúl Entrerríos Rodríguez polos sos méritos deportivos y el so venceyu coles escueles deportives municipales; y a l’Asociación ADANSI poles sos 30 años de trayectoria nos qu’impulsó proyectos pa llograr el máximu desenvolvimientu de persones con trestornu del espectru autista.
La Xunta de Voceres nun concretó la fecha en que se va celebrar el Plenu d’Honores y Distinciones onde se van materializar estes concesiones anque, previsiblemente y si les condiciones sanitaries derivaes de la pandemia lo permiten, va retrasase pa la seronda.
