Esa ye la entruga a la que tratará de responder el xuráu del Concursu Xixón Fala en 3. La Oficina de Normalización Llingüística de Xixón ta acabante anunciar la convocatoria de la tercer edición d’esta competición na que cada participante presenta un tema n’asturianu, en 3 minutos con un rexistru cultu o académicu.
Del 14 de xineru al 14 de febreru de 2021 ta abiertu’l plazu de presentación de solicitúes pa participar. La participación ye gratuita y les solicitúes han presentase pente medies del rexistru lletrónicu del conceyu de Xixón. Cada participante pue presentar un únicu tema.
El concursu divídese en tres categoríes: A) Temes venceyaos a la cultura y realidá asturiana B) Temes de divulgación -dambes pa persones mayores d’edá- y C) La mocedá fala en 3 -pa persones de 14 a 18 años-.
Cada estaya un primer premiu de 600 €, un segundu premiu de 275 € y un tercer premiu de 125 €. L’actu de presentación de los temes va ser el 20 de febreru nel Salón d’actos del Vieyu Institutu Xovellanos.
