Llaboral Cinemateca apuesta dende los sos entamos pol curtiumetraxe y el so espardimientu y dedica esta fin de selmana al cine en formatu curtiu con trés xornaes destinaes tantu al públicu xeneral como a los profesionales del sector.

Llaboral Ciudá de la Cultura acueye’l sábadu 25 la xornada asturiana de la iniciativa colaborativa CORTEN, un proyectu de promoción y espardimientu de los curtiumetraxes espublizaos polos catálogos Llaboral Cinemateca Curtios (Asturies), Shorts from Galicia, Cantabria en curtiu, Kimuak (Euskadi) y Shortzinema (Navarra) que van poder vese en filmoteques, sales comerciales y otros espacios afayadizos pa la so proyección. Amás, los sos directores y directores van poder viaxar pa presentar el so trabayu y participar n’alcuentros profesionales en caún de los territorios.

La xornada en Xixón consta de la proyección, a les 17:30 hores, d’una sesión especial dedicada a Nuevos Talentos Emerxentes del cine asturianu cola proyección de los trabayos de Carmen Menéndez, Non Jungle!; d’Asur Fonte, La sonrisa de los maniquís; d’Ana Izarzugaza, Gniele Baila; de Samuel Fernandi, El diañu; y de José Cachón, Sin pausa.

A les 19:00 hores, el Teatru de la Llaboral va acoyer la sesión de curtiumetraxes CORTEN qu’inclúi la proyección de los trabayos A rabia d’Alberto Díaz López (Shorts from Galicia), El querer de Miguel Manchetti (Navarra Zine Shorts), No hay fantasmas de Nacho Solana (Cantabria en Curtiu) y Irritis de Maider Oleaga (Kimuak); y que va cuntar cola presencia de el realizadores de los curtios. Estes dos sesiones tán abiertes a tolos públicos y son gratuites previa retirada d’invitación.

Amás, la proyección de curtiumetraxes va complementase con alcuentros que dexen l’intercambiu y conexón ente profesionales de les distintes autonomíes coles mires de que estes actividaes se conviertan en puntu de referencia pa facilitar la collaboración ente productores y realizadores.

Na xornada profesional, los asistentes van poder conocer el trabayu de promoción del curtiu que se realiza nel restu de comunidaes participantes en CORTEN y asistir a delles charres-alcuentru p’aprender a definir los oxetivos d’espardimientu de los sos trabayos o a desenvolver un bon dossier p’amplificar les oportunidaes de consiguir financiamientu. Los interesaos en participar nestes xornaes pa profesionales tendrán d’inscribise, antes del vienres 24 de marzu a les 12:00 hores.

Llaboral Cinemateca participa nestes xornaes CORTEN con cuatro curtiumetraxes que formen parte del catálogu Llaboral Cinemateca Curtios. Zoe & Renée d’Iván Ladeiras yá pudo vese na xornada celebrada en Cantabria; Fita de Diego Flórez va proxectar en Galicia; Manual de la siega de Samuel Fernandi va vese en Navarra, y Vas a ser mi memoria siempre de Marina Munárriz va facelo n’Euskadi.

Fin de selmana dedicáu al cortiu

Amás de la xornada CORTEN, el vienres 24 a les 19:00 hores, el Paraninfu de la Llaboral va acoyer la segunda parte del programa BAFTA Short Filme 2022, dedicáu a la promoción de los meyores curtiumetraxes británicos, gracies a la collaboración del British Council, como sociu cultural de la British Academy of Filme and Television Arts (BAFTA).

Esti programa inclúi’l curtiu ganador del Premiu BAFTA a Meyor Curtiumetraxe d’Animación, Do not feed the pigeons que dirixe Antonin Niclass; el meyor curtiu británicu nos Independent Filme Awards, Femme de Ng Choon Ping y Sam H. Freeman; la sátira Three meetings of the extraordinary committee de Max Barron y Michael Woodward; y el curtiu d’animación Night of the living dread d’Ida Melum.

Y, el domingu 26 a les 17:30 hores, grandes y pequeños van poder esfrutar de l’animación pa tolos públicos nuna nueva cita colos curtiumetraxes de Pequeños de cine, una cuidada selección de curtiumetraxes pa espectadores de toles edaes qu’axunta obres orixinales y estimulantes rebosantes d’idees y encantu, munches d’elles con una esitosa trayectoria en festivales nacionales ya internacionales.

L’accesu a la sesión BAFTA Short Filme Vol. II del vienres y pa les sesiones Llaboral Cinemateca Curtios: talentu emerxente y Curtiumetraxes CORTEN del sábadu ye gratuitu previa retirada d’invitación. Les entraes pa la proyección de Pequeños de Cine pueden adquirise a un preciu xeneral de 4€ y amenorgáu de 3€.