El Festillingües celebra la so segunda edición del 1 al 4 d’ochobre na Grapa d’Avilés
La segunda edición del Festillingües va celebrase del 1 al 4 d’ochobre na Grapa, n’Avilés, con una programación que va axuntar mientres cuatro xornaes lliteratura, música, talleres, alcuentros, actividaes pa la reciella y espacios de reflexón alredor de les llingües y les cultures. El festival va entamar el xueves 1 d’ochobre cola so charra inaugural y va continuar dende’l vienres con una programación que s’allargará hasta’l domingu.
L’apertura va tener llugar el xueves 1 d’ochobre a les 19:00 hores, cola charra inaugural «El Fueru d’Avilés», a cargu de Román Antonio Álvarez y presentada por Montserrat Machicado, de la Estaya de la Llingua d’Avilés.
La programación va continuar el vienres 2 d’ochobre, xornada na que va inaugurase a les 16:00 hores el Mercáu de les Llingües, una feria de llibros y cultura que va ser ún de los espacios del festival. A esa mesma hora van entamar los talleres «Trabayando coles llingües», ente los que ta’l taller d’escritura «El Pallabreru Mestizu. Llaboratoriu prestosu d’escritura multillingüe», impartíu por Ana Lamela, y el taller de lettering «Dibuxando pallabres», a cargu de Kazabasuras.
La tarde va incluyir tamién, a les 17:30 hores, la grabación en directu del programa «Sentir Asturies» de RPA. A les 19:00 hores va celebrase un recital lliterariu y musical interllingüísticu, con acompañamientu musical de Carla Miranda, nel que van participar Aníbal González, Esther Prieto, Alfonsu Fernández, Diego Solís, Angela Mit Belu, Tonia Kyriakoulakou y Montse L. Tolosana. La xornada va zarrar con dos conciertos: Mestura, de 20:00 a 21:00 hores, y Rubén Bada, de 21:00 a 22:30 hores.
El sábadu 3 d’ochobre va concentrar una bona parte de les actividaes del Festillingües. La xornada va entamar a les 10:00 hores cola mesa de diálogu «IA, tecnoloxíes y futuru de les llingües minorizaes», con Próspero Morán, Aymara G. Montoto y Softastur. A les 11:00 hores, Sergio Buelga va protagonizar un cuentacuentos pa la reciella, mentanto que a les 12:00 hores va celebrase la mesa «Crear conteníu en llingües minorizaes», con Vick Blanch, Viti n’asturianu y Gael Rodríguez, d’Andando con gaites. La mañana va zarrase col vermú lliterariu «Esti amor asturfalante», con Sofía Castañón, de 13:00 a 14:00 hores.
Pela tarde van volver los talleres «Trabayando coles llingües», con una propuesta de xuegos de mesa con Acuto y Susana Sela, de 16:00 a 17:00 hores, y un taller de creación musical con Vero Rubio, de 17:00 a 18:00 hores. A les 16:00 hores va entamar tamién el teatru de cai «La figura del pelegrín», con Sergio Buelga.
La programación va continuar a les 17:00 hores con un diálogu a dos sobre lliteratura, biblioteques y diversidá llingüística, protagonizáu por Montse L. Tolosana, bibliotecaria catalana, y Esther Martínez, bibliotecaria asturiana. A les 18:00 hores va ser el turnu de la conferencia «Prexuicios llingüísticos», impartida por María del Carmen Méndez Santos, de la Universidade de Vigo.
A les 19:00 hores va celebrase la mesa central del Foru de les Llingües y les Cultures, moderada por Inaciu Galán, cola participación d’Arantxa Margolles, d’Inciativa pol Asturianu, Montse L. Tolosana y María del Carmen Méndez Santos.
La música va poner el ramu a la xornada del sábadu. A les 20:00 hores va tener llugar el conciertu d’Autores nel Camín, Premiu La Busdonga, con Alicia Villanueva, Néstor Díaz y Esteban Verdeja, y a les 21:00 hores va actuar Guieldu.
El domingu 4 d’ochobre va llegar el zarru d’esta segunda edición. La última xornada va entamar a les 10:00 hores con actividaes formatives del programa Falamos, centraes n’asturianu y eonaviego. A les 11:00 hores va haber una visita guiada teatralizada per Avilés con Marcos del Torniello, siguida, a les 12:30 hores, d’una llectura dramatizada de Montse L. Tolosana.
El programa va concluyir a les 13:00 hores cola proyección del documental «No se dice ye, se dice es. Represión llingüística na Asturies del Franquismu», que va poner el puntu final a cuatro xornaes d’actividaes venceyaes a les llingües, la lliteratura, la creación, la cultura y la música.