L’Artic Sunrise ye’l mayor de los trés barcos de Greenpeace y col qu’entamó la campaña “El gas salnos caru”, escontra’l gas fósil como sustitutu del carbón. Con esi envís atracó dellos díes n’Avilés, con visites guiaes en castellanu y puestos informativos. El rompexelos tien 17 marineros ente fixos, contrataos y voluntarios de munches nacionalidaes que falen ente ellos n’inglés, helipuertu y llanches motores. La visita entamaba con una charra xeneral de la organización y del barcu. Tres d’ella, xubíase de cuatro en cuatro al barcu, primero víase la sala mandos, llueu la cubierta y nel fondu un videu de publicidá de la organización que cuenta con 3.200.000 socios nel mundiu y 50 años de llabor.
Calquen nes dos pates del movimientu, l’ecoloxismu y el pacifismu. Al denunciar los efectos negativos del gas y el so emplegu nes guerres d’Ucraína y Palestina, ente otres. Apurríen información como que n’España consúmese gas d’Arxelia, EE.XX. y Rusia, xenerando y financiando les guerres d’anguaño. Amás de resultar na so versión doméstica de los más caros d’Europa.D’otra miente, el gas “natural” tiene un gran efeutu ivernaderu con un potencial de calecimientu global a los 20 años 84 vegaes superior al del CO2.
Proponen que nun se reduza namás el 40% nel 2030, sinón un desaniciu total nel 2035, pa caltener la temperatura global per baxo de la llende de los 1,5 graos d’aumentu col cambéu climáticu. Equí denuncien que les centrales d’Aboño y Soto Ribera nun aportaríen gran meyoría climática cola transición al gas. Y el marafundiu que supunxo la infrautilizada y descomanadamente grande regasificadora d’El Musel.
Dempués d’Asturies, percorrerá Francia, Bélxica, Alemaña, Croacia y Grecia col enfotu d’apurrir la so campaña al conxuntu de la XE. Esti gran colectivu mundial nagua pola paz verde que-y da nome. Nestos tiempos escuros, apurren una lluz pa un futuru nel que’l gas, con tol procesu contaminante qu’arreya, nun tenga llugar na cadena enerxética.
