La conseyera de Salú, Concepción Saavedra, propunxo güei un pactu social y políticu «que dexe diseñar una llei de salú mental pa consolidar el modelu d’atención comuñal que s’aplica n’Asturies. Con esa norma pretendemos xunir al conxuntu de los actores implicaos nun enfoque compartíu y potenciar la respuesta a los desafíos que se nos presenten nesti campu”, esplicó.
Saavedra presentó esta mañana na Xunta Xeneral el Plan de Salú Mental 2023-2030, aprobáu pol Conseyu de Gobiernu en marzu, qu’inclúi más de 240 acciones pa fortalecer la resiliencia indivicual y colectiva de la población y promover un modelu d’atención integral que favoreza la recuperción y la inclusión social. Unu de los principales oxetivos del documentu ye menguar les muertes y los intentos de suicidiu.
Nesti sentíu, Salú va afondar nes acciones empobinaes a la población infanto-xuvenil, les persones mayores y los grupos vulnerables. Tamién se va centrar na prevención, la detección precoz y l’atención a la conducta suicida. El Principáu busca involucrar nesti llabor a tolos sectores rellacionaos con esti campu d’intervención: salú, servicios sociales, educación, trabayu, xusticia, mediu ambiente, urbanismu, vivienda y medios de comunicación, siempres sol principiu de equidad y l’enfoque de xéneru.
El Plan de Salú Mental 2023-2030 configúrase al rodiu de cuatro grandes modelos d’actuación:
– Los determinantes sociales de la salú mental.
– La promoción y protección de la salú.
– La protección de los derechos humanos.
– L’atención y tratamientu de los problemes de salú mental.
Esta guía d’actuación hasta 2030 detalla propósitos y encamientos y busca favorecer la recuperación ya inclusión social de los pacientes, mesmo qu’amenorgar los riesgos y estigmes acomuñaos a les patoloxíes y trestornos qu’afecten al bientar emocional, psicolóxicu y social de la ciudadanía.
«Esti plan ye la guía de les polítiques y los recursos nesti campu cola intención decidida de llograr ente tolos axentes implicaos una meyor salú mental na población asturiana», resumió Saavedra.
