El Gobiernu asturianu treslladó a Vesuvius Ibérica Refractarios S. A. la so firme oposición al espediente de regulación d’empléu presentáu pola compañía, nel que se contempla’l cese de l’actividá productiva de la planta de Llangréu. Asina lo comunicó’l conseyeru d’Industria, Empléu y Promoción Económica, Enrique Fernández, mientres un alcuentru solicitáu pola empresa nel que tamién tuvieron presentes los directores d’Industria y d’Empléu y Formación, Rosana Prada y Pedro Fernández-Raigoso, respectivamente.
Na xunta, la multinacional reconoció que nun existen razones económiques, estructurales o operatives pal zarru de la factoría asturiana y punxo en valor el so lideralgu nel sector de les cerámiques refractaries, asina como la profesionalidá y el nivel productivu y técnicu de la planta de Llangréu.
La multinacional reconoció que nun existen razones económiques, estructurales o operatives pal zarru de la factoría
Según Enrique Fernández, resulta “contradictoriu” y una xirigonza” que Vesuvius almita la excelencia de les sos instalaciones n’Asturies y anuncie al empar el so zarru en función d’una decisión xeoestratégica nel marcu d’una reestructuración del grupu énte les incertidumes del sector del aceru n’Europa.
Pal titular d’Industria, «nun existen motivos nin causes xustificaes» pa una decisión como l’anunciada por Vesuvius y el treslláu de la producción de Llangréu a países del Este. De la mesma, Fernández precisó que la opción adoptada pola empresa produzse nun momentu en que dende l’Executivu central y el Gobiernu d’Asturies tán definiéndose midíes de sofitu al sector industrial no que fai a los costos medioambientales y enerxéticos y cola necesidá de reforciar, n’ámbitu de la Unión Europea, los aranceles a les importaciones de productos siderúrxicos de terceros países.
«Énte esti escenariu, alvertimos del impactu social y económicu que va xenerar el zarru de la fábrica de Llangréu y de que vamos tar al llau de los trabayadores pa defender l’empléu y l’actividá», añedió’l conseyeru. Tres esti primer alcuentru con Vesuvius, el Gobiernu d’Asturies va estudiar la documentación presentada y va caltener una actitú proactiva pa tratar de buscar una solución qu’evite’l zarru de l’actividá productiva.
