La creación d’esta bolsa de trabayu estraordinaria ta vinculada a la xestión de proyectos que reciban financiación del fondu européu Next Generation UE
La Conseyería d’Alministración Autonómica, Mediu Ambiente y Cambéu Climáticu publicó güei nel Boletín Oficial del Principáu (Bopa) la convocatoria d’un procesu selectivu pa la creación d’una bolsa de trabayu estraordinaria de personal temporal dirixida a la contratación de responsables dixitales. Estos puestos nuevos tán vinculaos a la xestión de los proyectos que se deriven del fondu Next Generation EU, habilitáu pola Unión Europea.
La llista ta lligada al programa temporal plurianual pa la xestión de proyectos de tresformación dixital qu’opten a eses ayudes europees y a los planes nesti ámbitu de l’Alministración Xeneral del Estáu.
El programa rique la creación de 10 places d’informática especializaes: 6 xefatures de proyectos y 4 analistes programadores, que van ser responsables de la planificación, coordinación, execución y siguimientu de los proyectos que se desenvuelvan. Los contratos van tener una duración de trés años, con posibilidá de prórroga pa un añu más.
Los empleaos que s’incorporen van reforzar los medios personales de la Dirección Xeneral de Seguranza y Estratexa Dixital pa la xestión de los fondos empobinaos a la dixitalización, concebíos como una de les palanques de cambéu pa la recuperación de la economía, del texíu productivo y del empléu, amás de pa la tresformación de l’Alministración autonómica.
La convocatoria produzse énte la necesidá urxente del Principáu de disponer d’un cuerpu de funcionarios propiu, qu’axunte los perfiles afayadizos pa la tresformación camín d’una organización más dixitalizada. Trátase de profesionales titulaos en ciencies, tecnoloxíes, inxenieríes o matemátiques, con un grau altu de cualificación, que puedan trabayar de forma eficaz y efectiva n’entornos d’actividá pública marcaos pola esixencia d’innovación, análisis de datos, usu de tecnoloxíes emerxentes y programación basada en metodoloxíes áxiles.
Les solicitúes han presentase al traviés d’un formulariu electrónicu específicu (col códigu de solicitú: RRHH0076T01), disponible na sede electrónica del Principáu, a la que s’accede al traviés de la dirección https://sede.asturias.es/. El plazu va ser de diez díes naturales dende les 00:00 hores del otru día de publicase la convocatoria nel Bopa, quier dicise, dende mañana.
La convocatoria pue consultase nesti enllaz: https://cutt.ly/tnUk24k
