El Gobiernu d’Asturies conmemora esti añu’l 8-M, Día Internacional de les Muyeres, reivindicando la innovación n’igualdá, col lema Igualdad para innovar. Igualdad real/ Igualdá p´anovar. Igualdá dafechu/ Igualdá p´anovar. Igualdá dafeito. El gobiernu pon asina la mirada na necesidá de más muyeres y más feminismu na innovación, tantu pa solucionar los problemes endémicos como pa evitar que la tecnoloxía, la intelixencia artificial y los sectores estratéxicos, llueñe de cerrar, abran entá más les fiendes ente muyeres y homes.
La Dirección Xeneral d’Igualdá diseñó una campaña, que se va espublizar en redes sociales y medios de comunicación, pa empecipiar un diálogu social sobre la necesidá de que la innovación aproveche la conocencia de muyeres y homes y avere l’horizonte de la igualdá efectiva. La directora xeneral d’Igualdá, Nuria Varela, señala que “los espacios d’interacción social virtual tán xenerando nueves formes de violencia contra les muyeres y la mayor parte de los desenvolvimientos d’intelixencia artificial tienen los mesmos sesgos misóxinos que les sociedaes que los tán produciendo”.
“El 8 de marzu, Día Internacional de les Muyeres, ye una xornada de llucha y celebración del movimientu feminista. Nos últimos años los gobiernos celebraron actos institucionales, pero’l protagonismu d’esti día ye del feminismu. Como Gobiernu, correspuéndenos dar soluciones a los problemes. Anguaño nun vamos entamar actu institucional, vamos participar nes celebraciones virtuales, por culpa del andanciu, y vamos sumanos al 8 de marzu, igual qu’asocedió’l pasáu 25-N, Día Internacional contra la Violencia de Xéneru, allumando de moráu l’edificiu de Presidencia’l domingu y el llunes”, añedió Varela.
