El Conseyu de Gobiernu autorizó güei un gastu de 3,4 millones para incentivar la creación y afitamientu de centros d’I+D+i de grandes empreses n’Asturies. L’Institutu de Desenvolvimientu Económicu del Principáu d’Asturies (Idepa) va xestionar esta convocatoria, que se va publicar llueu, y que cunta con financiamientu de la Conseyería de Ciencia, Innovación y Universidá.

A esti programa d’ayudes, por un periodu de dos años (2023-2024), van poder optar tantu les compañíes que yá cunten con centros enllantaos nel Principáu pa la realización de nuevos proyectos, como les grandes firmes que deseyen instalar la so see d’investigación ya innovación n’Asturies.

De 2019 a 2022 creáronse na comunidá diez nuevos centros d’I+D+i venceyaos a grandes empreses. Asina, Asturies pasó de dos a 12 equipamientos d’esti tipu.

Solidaridá colos países menos desenvueltos

L’Executivu autonómicu dio lluz verde a 2.985.000 euros pa subvencionar iniciatives de cooperación al desenvolvimientu. Estos fondos van destinar a dos llinies distintes d’ayudes: 2.835.000 euros a proyectos y 150.000 a microacciones de desenvolvimientu.

La convocatoria tien como oxetivu impulsar procesos que faciliten l’accesu a los servicios básicos y l’amenorgamientu de desigualdaes. Les muyeres, la infancia, la mocedá y los habitantes de les árees rurales son grupos prioritarios,como tamién lo son los colectivos en riesgu por conflictos civiles, militares o crisis de llarga duración, los pueblos indíxenes y la población saharagüi y palestina.

Meyores na sanidá pública

L’Executivu autorizó un gastu de 2,6 millones para la implantación d’un sistema d’información de llaboratoriu (SIL) corporativu na rede sanitaria pública. Esta ferramienta, que facilita la xestión de tolos procesos de los llaboratorios clínicos, cuenta con financiamientu del Fondu Européu de Desenvolvimientu Rexonal (Feder).

El SIL ye una aplicación centralizada y compartida polos hospitales que va xenerar mayor eficiencia al dexar realizar una xestión unificada por aciu unu pidimientu de pruebes de llaboratoriu única y accesible dende los sistemes d’hestoria clínica electrónica. Tamién va contribuyir a unificar los catálogos de pruebes, usando sistemes de codificación normalizaos, acordies con los requisitos de interoperabilidad nacionales y europeos. Amás, va facilitar un repositorio únicu de resultancies integráu con tolos sistemes asistenciales, lo que va evitar la repetición innecesaria de pruebes diagnósticas y va aforrar costos.