El Principáu trabaya nel diseñu d’una plataforma dixital pa facilitar la venta de productos asturianos al traviés d’internet a les empreses más pequenes. Esta iniciativa, na que collaboren dende va meses les conseyeríes de Presidencia, Industria y Ciencia, supon un nuevu sofitu al texíu económico rexonal nel marcu de l’actual pandemia de coronavirus, que provocó un aumentu de les compres online. El proyectu tien un costu envaloráu de 100.000 euros, a los qu’habría qu’añedir un gastu añal próximu al mediu millón.
La utilidá práctica d’esta midida va probar con un plan piloto al que se destinen 20.000 euros, tramitáu pela vía d’emerxencia pola Conseyería de Presidencia, y sobre’l que s’informó güei al Conseyu de Gobiernu. Esti programa orientase al sector de l’artesanía y va beneficiar a unes 70 empreses asturianes que nun van poder celebrar n’Uviéu la tradicional feria navidiega Rosaleda d’artesanos poles restricciones derivaes de la crisis sanitaria.
L’oxetivu fundamental del proyectu global ye facilitar el tresformamientu dixital de les empreses, especialmente d’aquelles de menor tamañu, y ayudar a superar l’adversu escenariu motiváu poles llimitaciones impuestes énte l’avance de la covid-19, por aciu la creación de tiendes virtuales agospiaes na plataforma. Pa ello, dende l’Alministración caltendrá un contactu permanente con tolos sectores implicaos, col fin de conocer les sos necesidaes y demandes.
Esta ferramienta va dexar a establecimientos y empreses que vienden productos asturianos d’artesanía, agroalimentación, turismu, etcétera, ufiertar unos servicios a los que nun podríen optar de forma individual pol so eleváu costu, pero que nestos momentos resulten fundamentales para la so supervivencia y modernización. El Principáu focaliza los sos esfuerzos na creación d’un sistema con numberoses funciones d’altu valor pa autónomos y pymes, que-yos facilitaría l’establecimientu de cadenes de suministru y aliances para la vienta esterna, ente otres ventayes.
Esta midida tamién va apurrir beneficios a los consumidores, que van tener la posibilidá d’atopar nuna única páxina web producto asturianos de calidá, mercar de forma axilosa y cola máxima seguridá, según adquirir productos de dellos establecimientos pa recibilos nes sos cases nun únicu envíu.
Tratase d’un proyectu estratéxicu de collaboración y modernización dientro de l’Alministración autonómica. Los distintos departamentos implicaos céntrense anguaño nel desenvolvimientu tecnolóxicu y normativu de la plataforma. Tamién axusten un alcuerdu marco para la loxística con Correos, según la emisión de bonos de consumu con delles entidaes bancaries.
