El Gobiernu d’Asturies moviliza alredor de 320 millones na execución de la Estratexa Industrial d’Asturies 2030, el proyectu impulsáu pola Conseyería d’Industria, Empléu y Promoción Económica p’avanzar nun sector secundariu más competitivu, dixital, inclusivu y sostenible.

El conseyeru d’Industria, Empléu y Promoción Económica, Enrique Fernández, presentó un primer balance de los fondos executaos nel 2021, amás de los compromisos presupuestarios pal 2022, nun alcuentru del Foru pola Industria, l’órganu de reflexón y debate qu’axunta al Gobiernu d’Asturies colos axentes sociales y económicos.

Na xunta tamién participaron la viceconseyera de Mediu Ambiente y Cambéu Climáticu, Nieves Roqueñí; los directores xenerales d’Industria, Juan Carlos Aguilera, y d’Innovación, Investigación y Tresformación Dixital, Iván Aitor Lucas, y la directora xeneral d’Enerxía, Minería y Reactivación, Belarmina Díaz.

Les inversiones previstes correspuenden a les cuatro grandes exes sobre los que s’asitia la Estratexa Industrial 2030:

  • Sostenibilidá na industria: 106.931.000 euros p’acciones rellacionaes col tránsitu escontra un modelu económicu neutru n’emisiones, amás de pa consolidar y ampliar l’actividá industrial como motor de desenvolvimientu económicu, de xeneración d’actividá, empléu y riqueza a nivel rexonal.
  • Tresformación dixital: 42.477.000 euros en midíes empobinaes al desenvolvimientu de la innovación dixital, la promoción de la Industria 4.0 y el fomentu y aplicación de tecnoloxíes habilitadores de procesos nuevos d’un componente innovador altu.
  • Competitividá industrial: 98.029.000 euros destinaos a aumentar l’interés d’Asturies como sitiu d’inversión pa captar proyectos estratéxicos; el fomentu de la internacionalización, la meyora de les infraestructures industriales y la medría del gastu n’I+D+i.
  • Inclusión y la cohesión territorial: 40.912.000 euros pente medies del diálogu social, la definición de perfiles profesionales nuevos y la promoción de la empleabilidá ente los colectivos con más dificultaes d’inxertamientu llaboral.

A estes inversiones súmase una partida de 30,98 millones n’infraestructures qu’ayuden a la meyora de los niveles de competitividá y diversificación del texíu industrial.

El conseyeru indicó que’l financiamientu d’estos compromisos correspuende a fondos autonómicos, estatales y europeos, que se van dir aumentando a tenor del desplegue de los fondos del Plan de Recuperación, Tresformación y Resiliencia.

Contestu xeneral

Na xunta del Foru pola Industria, Fernández tamién fixo referencia al contestu xeneral del sector, que calificó de “difícil” pola situación de los precios de la enerxía y de les materies primes, y que s’agravó pola invasión d’Ucraína por Rusia.

“Esti marcu esíxenos aumentar les midíes de sofitu a la industria”, opinó’l conseyeru, quien volvió reclamar una actuación coordinada de la Unión Europea y el cambéu del sistema de fixación de precios de la enerxía.