El vicepresidente y conseyeru d’Alministración Autonómica, Mediu Ambiente y Cambéu Climáticu, Juan Cofiño, destacó’l protagonismu qu’otorga’l Gobiernu d’Asturies a les polítiques rellacionaes cola agua nesta llexislatura, col diseñu d’una estratexa autonómica pa los próximos diez años que preve una inversión de casi mil millones n’infraestructures hidráuliques tantu de suministru como de saneamientu y depuración, según en reutilización, renovación de redes y amenorgamientu de perdes y eficiencia enerxética, ente otres midíes.
Mientres la inauguración de la xornada Gobernanza y sostenibilidá pa una llei d’agües n’Asturies, Cofiñu resaltó qu’esti ye tamién el mandatu de “la planificación hidráulica”, pos al plan de suministru, apocayá aprobáu y con una inversión prevista de 433 millones, y al plan de saneamientu y depuración, que se va aprobar llueu ya incorpora una cuantía de 470 millones, xúnese’l plan hidrolóxicu estatal (2021-2027).
Esta programación va rematar col proyectu de Llei d’Agües, yá n’ellaboración, que va sustituyir a la normativa vixente dende 1994 pa actualizar los principios que se fueron desenvolviendo en distintes directives europees rellacionaes con esti recursu y col mediu ambiente, col fin de dotar Asturies d’un modelu sólidu de xestión integrada de los recursos hídricos autonómicos. “La llei va garantizar l’accesu de tola ciudadanía y usuarios a los servicios de l’agua en términos d’igualdá y de respetu a la protección del recursu, de les mases d’agua y de los ecosistemes asociaos, incorporando’l restu de les
polítiques sectoriales y l’ordenación del territoriu y urbanismu”, indicó’l
conseyeru.
Ente otros aspeutos, la normativa tamién pretende aplicar el principiu de recuperación de costos nel ciclu integral de l’agua, asina como definir el modelu de xestión de les cuenques intracomunitaries susceptibles de ser tresferíes pola Alministración Xeneral del Estáu, qu’afectaría a barganal del 90% la población y al 70% de la superficie rexonal. “A última hora, al traviés d’esta llei queremos xestionar el ciclu integral de l’agua de forma global, cola coordinación de tolos axentes participantes, tanto públicos como privaos, y nun nuevu marcu de gobernanza y sostenibilidá”, sorrayó’l vicepresidente.
Cofiño resaltó que l’agua “ye un factor determinante pa la crecedera económica” y añedió que “la prestación de servicios básicos como’l suministru o la depuración contribúin a la cohesión territorial, al ser aspeutos clave por que los habitantes de les zones rurales esfruten de condiciones de vida similares a los de les redolaes urbanes”.
Nes distintes sesiones de la xornada, entamada pola conseyería, participaron la viceconseyera de Mediu Ambiente y Cambéu Climáticu, Nieves Roqueñí; la directora xeneral de l’Agua, Vanesa Mateo; el xerente de Cadasa, Julio Pérez, y la directora xeneral de Finances y Economía, Mar Salgado, xuntu con ponentes espertos universitarios; la presidenta de la Federación Asturiana de Conceyos, Cecilia Pérez; el xefe de la Oficina de Planificación de la Confederación Hidrográfica del Cantábricu, Tomás Durán, y el presidente de l’Asociación Española de Suministru d’Agua y Saneamientu, Fernando Morcillo.
El foru cuntó, igualmente, con una nutrida asistencia de representantes de los distintos niveles de les alministraciones estatal, autonómica y local, lo mesmo que d’empreses qu’empresten servicios nel ciclu urbanu de l’agua, compañíes hidroeléctriques y otros actores con presencia nel sector.
Los espertos encetaron cuestiones como la necesidá d’ameyorar la tresparencia y l’información que recibe’l consumidor pa llograr una participación efectiva en tomar de decisiones o los retos a los que s’enfrenta’l sector de l’agua en materia de sostenibilidá, fundamentalmente los referíos a la recuperación de los costos d’operación del sistema y de financiamientu de les inversiones.
Coles mesmes, aldericóse sobro distintos modelos autonómicos de gobernanza de l’agua col director xeneral de l’Axencia Vasca de l’Agua, Antonio Aiz; la directora d’Agües de Galicia, Teresa Gutiérrez, y la directora xeneral d’Obres Hidráuliques y Puertos de Cantabria, Sandra García.
