El Gobiernu d’Asturies sofita l’esplegue de midíes aprobaes ayeri pol Conseyu de Ministros pa facer frente a los daños económicu y social de la guerra de Putin. Dende’l gobiernu consideren tamién perpositivu l’alcuerdu alcanzáu pol presidente Pedro Sánchez nel Conseyu de la Unión Europea por qu’España y Portugal puedan aplicar midíes escepcionales que pongan tope al preciu del gas, principal causa del encarecimientu de la enerxía y de la consecuente alza d’inflación.
El Principáu celebró’l miércoles pasáu una xunta estraordinaria del Conseyu de Gobiernu pa desaniciar los efectos de la espiral inflacionista. Entós adoptó midíes de sofitu al sector primariu, alcordó complementar nun 50% el bonu social térmicu y anunció un proyectu de llei que faga posible la revisión temporal de delles de les tases venceyaes a los sectores más castigaos, como’l tresporte, la pesca, la ganadería o l’agricultura. Dalgunes d’eses iniciatives yá tán a valir. Por casu, dende güei ta abiertu’l plazu de solicitú d’ayudes correspondientes a la Política Agraria Común (PAC), qu’esti exerciciu suman 96 millones. Esta cantidá va sirvir de garantía financiera por que los bancos puedan adelantrar el 90% de los pagos a llabradores y ganaderos.
Na mesma xunta, el Gobiernu d’Asturies plantegó propuestes y decisiones d’algame nacional. Asina, sofitó les xestiones europees de Pedro Sánchez, que remataron na reconocencia de la escepcionalidá enerxética de la Península Ibérica. A falta de concreción, esti entendimientu va dexar qu’España y Portugal impongan una llende cimera al preciu del gas, lo que minorará sensiblemente’l preciu resultante del mercáu eléctricu y ensin afección sobre los consumidores privaos nin industriales. L’abaratamientu d’estos costos ye de la máxima relevancia pa la industria y sobremanera, pa les compañíes que precisen muncha enerxía.
Otramiente, el Gobiernu d’Asturies defendió la intervención inmediata sobre los precios del carburante. El real decreto llei alcordáu pol Conseyu de Ministros inclúi una rebaxa de 0,20 euros per llitru de combustible recargáu, que va entrar a valir a partir del vienres. Esta foi –xuntu cola concesión d’ayudes directes al sector- una de les decisiones que contribuyeron al alcuerdu coles principales organizaciones del tresporte. L’Executivu del Principáu apela a la sensatez y responsabilidá de quien entá caltienen los paros, de cuenta que dexen la recuperación de la normalidá empresarial n’Asturies, afectada por problemes de suministru y distribución.
La disposición de 10.000 millones en creitos ICO tamién va na llínea de les propuestes del Principáu, que defendía una prórroga nel plazu de los préstamos. Por poner otra amuesa, l’Executivu autonómicu defendió la posibilidá de recurrir de nuevu a los espedientes de regulación temporal d’empléu en condiciones similares a les que rixeron mientres la pandemia. Esta opción tamién foi asumida pol Gobiernu d’España.
