El Gobiernu d’Asturies alcordó güei revalidar los oxetivos del Programa para la Prevención de la Ludopatía 2018-2020 y reforzar la protección de los colectivos más vulnerables énte’l xuegu. L’Executivu tomó esta decisión énte la imposibilidá d’executar delles de les midíes previstes pa 2020, como consecuencia del andanciu del coronavirus. Eses iniciatives van retomase anguaño, col fin de rematar l’itinerariu d’intervención recoyíu nel programa, de cuenta que puedan completase los indicadores d’evaluación que dexen diseñar una nueva estratexa de cara al futuru.
El documentu propón distintes actuaciones empobinaes a prevenir conductes patolóxiques rellacionaes col xuegu, ente les que figuren campañes divulgatives y l’incorporación d’información nos conteníos curriculares de tolos niveles educativos sobro los riesgos d’una práctica irresponsable. Tamién plantega la llimitación de la publicidá y la restricción del accesu a los locales onde se practica’l xuegu, según la collaboración coles asociaciones de persones afectaes.
El Programa para la Prevención de la Ludopatía detalla la estratexa d’actuación del Gobiernu d’Asturies nesti ámbitu y recueye una batería de midíes que s’articulen en redol a cinco pilastres: formación ya información, educación, control ya inspección, atención sanitaria ya inclusión social.
Ente estes iniciatives enmárcase la nueva edición de la campaña «Tú ganes», llanzada’l mes pasáu, pa concenciar, bien especialmente a la mocedá, sobro los riesgos qu’entrañen los xuegos d’azar. Pa ello, el goniernu cunta cola collaboración del espertu en cálculu llangreanu Alberto Coto, que protagoniza dos vídeos nos que recurre a conceutos matemáticos para desmitificar falses creencies.
El xuegu patolóxicu acarreta graves consecuencies pa quien lo sufren y tamién pa la so redolada, polo que les midíes de prevención tienen de tener en cuenta ámbito como l’educativu, el sanitariu y l’asistencial pa ufiertar una visión integral sobro esti problema social y facilitar qu’estes persones dispongan de la información necesaria pa tomar les meyores decisiones sobro la so salú física, mental y social.
