El conseyeru de Mediu Rural y Cohesión Territorial, Alejandro Calvo, axuntóse güei col secretariu xeneral d’Agricultura y Alimentación del Ministeriu d’Agricultura, Pesca y Alimentación (MAPA), Fernando Miranda. L’alcuentru sirvió pa preparar el próximu Conseyu estraordinariu de Ministros d’Agricultura y Pesca de la Unión Europea (UE), yá qu’Asturies ostenta mientres esti primer semestre la representación de les comunidaes autónomes.

Mientres la xunta, dambos responsables afondaron nes midíes pa faer frente a la crisis aniciada nos mercaos internacionales de resultes de la invasión d’Ucrania. N’especial, fixeron fincapié nes propuestes de les comunidaes de la cornisa cantábrica.

Calvo espunxo qu’una de les cuestiones más urxentes ye dar respuesta a los problemes de lliquidez que tien el sector. El conseyeru esplicó que les comunidaes de la cornisa cantábrica coinciden col ministeriu na necesidá de crear llínees específiques de lliquidez garantizaes pola Sociedá Anónima Estatal de Caución Agraria (Saeca). Coles mesmes, trabayar na activación de tolos mecanismos venceyaos a la Política Agraria Común (PAC), como adelantu de plazos o medría de porcentaxes, flexibilización de controles y condicionalidad.

Otra propuesta consiste n’activar el fondu de crisis de la PAC por qu’el estáu disponga de fondos adicionales pa ayudar a los sectores más afectaos. Asturies y el restu de comunidaes cantábriques propunxeron que dende Europa s’estableza una llínea específica d’ayudes directes pal sector ganaderu, con especial atención al lácteo, nun marcu que dexe que puedan xestionase con rapidez y eficacia.

La tercer llínea de trabayu ye l’aceleración de l’aplicación de la Llei de Cadena Alimentaria que torgue de manera efectiva la vienta a perdes y garantice la rentabilidá de les esplotaciones. Les comunidaes de la cornisa comprometense a desenvolver lo más aína, y de manera coordinada col ministeriu, índices de costos de referencia por que puedan aplicase en tolos contratos del sector.

Mesa del sector lácteo

Precisamente, l’axilización d’esta nueva normativa ye l’asuntu nel que más s’incidió na xunta de la mesa del sector lácteo. Nel alcuentru telemáticu, nel que tamién participó’l conseyeru xuntu colos miembros del Conseyu Agroalimentario y asociaciones sectoriales, analizáronse los principales indicadores de los últimos meses.

El primer pasu, nel que yá se ta trabayando, ye xenerar índices de precios n’orixe que seyan venceyantes y que van sirvir como referencia a la d’aplicar la llei n’Asturies, col fin d’evitar la vienta a perdes. Tratase de que les medríes de los costos de les materies primes repercutan de manera xusta y equitativa en tolos eslabones de la cadena.

El Gobiernu del Principáu aportuna na prioridá de que toes estes midíes dexen avanzar nel sofitu estructural a les esplotaciones de calter familiar, venceyaes al territoriu y con una dimensión amenorgada y fuertemente condicionada pola orografía. Estes esplotaciones constitúin un elementu estratéxicu y esencial del sector primariu, contribuyendo a la llucha contra la despoblación y l’abandonu del territoriu rural.