El Gobiernu d’Asturies aprobó güei un gastu de 6.050.000 euros pa cinco convocatories d’ayudes empobinaes al fortalecimientu y afitamientu d’un texíu industrial y empresarial diversificáu, modernu y competitivu. L’Institutu de Desenvolvimientu Económicu del Principáu (Idepa) va ser l’organismu encargáu de xestionar estos fondos, que van sovencionar proyectos de tresformamientu dixital, innovación y internacionalización, según inversiones ya iniciatives de compañíes tractores d’especial interés.
Les convocatories son les siguientes:
Ayudes al tresformamientu dixital: 1.250.000 euros
Esta llinia fomenta la competitividá de les empreses rellacionaes cola industria 4.0 nel ámbitu de los procesos, el productu y el modelu de negociu, cola aportación de soluciones innovadores venceyaes a la dixitalización de procesos, la incorporación de software para la xestión intelixente d’infraestructures, l’aplicación de sensórica, etcétera. Ente los gastos sovencionables figuren los activos materiales ya inmateriales, los servicios de consultoría y los costos de personal técnicu propiu.
En 2021 aprobáronse 62 proyectos de 60 empreses, que recibieron una ayuda de 1,5 millones y movilizaron en global 5.000.000 euros.
Proyectos d’inversión empresarial: 2.500.000 euros
Estes sovenciones favorecen la inversión granible al traviés d’actuaciones intensives en capital, tecnoloxía y empléu o otres que dexen aumentar la competitividá. La convocatoria, que se dirixe a grandes empreses –pa inversiones destinaes a una nueva actividá económica- y a pymes –pa cualquier forma d’inversión inicial-, financia la compra de terrenes y la so urbanización; edificios, instalaciones, maquinaria y equipos, según patentes, llicencies y derechos de propiedá intelectual, ente otros gastos.
L’añu pasáu concediéronse 4,4 millones n’ayudes a 60 empreses, que xeneraron una inversión global de 53 millones. Estes iniciatives favorecen la creación de 101 nuevos puestos de trabayu y el caltenimientu d’otros 1.105.
Programa Cheques, modalidá d’innovación: 600.000 euros
Esta llinia promueve la realización d’actividaes y la prestación de servicios empobinaos a la meyora de la competitividá empresarial por aciu l’impulsu de proyectos d’innovación, investigación y desenvolvimientu tecnolóxicu, en llinia cola Estratexa d’Especialización Intelixente S3.
En 2021 aprobáronse 129 solicitúes y concediéronse 621.250 euros n’ayudes, lo que xeneró una inversión inducida de 1,3 millones.
Promoción internacional: 1.000.000 euros
La convocatoria pretende consolidar la proyección internacional de les empreses asturianes, facilitando la promoción esterior de los sos productos y servicios, amás de la so participación en programes internacionales, la cooperación con compañíes estranxeres y l’inversión fora d’España. Ente otres iniciatives, estes ayudes financien página web, material promocional, participación en feries, viaxes de prospección, llicitaciones internacionales, etcétera.
Un total de 91 empreses van beneficiase d’estes subvenciones l’añu pasáu. En concretu, recibieron 939.758 euros, con una inversión inducida de 2,6 millones.
Proyectos d’empreses tractoras d’interés: 700.000 euros
Esta llínea cunta con dos apartaos: unu pa fomentar la inversión empresarial y otru pa impulsar la creación d’empléu. D’esta miente, finánciense tanto gastos materiales (terrenes, edificios, maquinaria…) ya inmateriales (concesiones alministratives, propiedá industrial, aplicaciones informátiques, etc.), como la contratación de personal.
Nos postreros trés años (2019-2021) recibieron sofitu 17 proyectos d’empreses tractoras, con una sovención aprobada de 2,4 millones y una inversión global de 34,3.
