El Gobiernu d’Asturies va esixir al Ministeriu de Tresportes y Movilidá que retire’l proyectu alternativu pa construyir un vial en superficie en Xove, en Xixón. El presidente, Adrián Barbón, asumió güei esti compromisu nuna xunta con delles asociaciones vecinales de la ciudá en conociendo que les autoridaes estatales refugaben un soterramientu por cuestiones técniques de seguridá. “Vamos dir de la mano del Conceyu y de los vecinos. El ministeriu plantegó l’alternativa d’un vial en superficie por ser lo más rápido, pero si a los vecinos y vecines nun-yos sirve, a nós tampoco”, garantizó Barbón.
Comprensivu cola fartura vecinal tres años d’espera por una solución al tráficu rodáu na zona oeste de Xixón, el presidente aseguró que’l so gabinete “nun va mirar pa otru llau” y que’l vial de Xove va ser un asuntu “clave nesta llexislatura”. Asina, de primeres, el Gobiernu yá reclamó al ministeriu que redacte un proyectu vidable técnicamente y nel plazu más curtiu posible”.
Mientres l’alcuentru celebráu en Presidencia, púnxose sobre la mesa una posible alternativa pa construyir un túnel n’Aboño que dea salida al tráficu. El presidente va encamentar al ministeriu a qu’estudie esta alternativa ente toles posibles. “Recoyendo’l pidimientu que me fixo, voi actuar d’interlocutor y voi pidir un alcuentru a trés partes: Gobiernu, conceyu y ministeriu pa buscar una solución consensuada”, esplicó.
A xuiciu de Barbón, la busca d’alternatives nun torga la depuración de responsabilidaes: “Pidimos información sobre cuándo y cómo se redactó’l proyectu inicial qu’agora se refuga por poner en peligru 150 viviendes del barriu. Ye necesario depurar responsabilidaes”.
