La Conseyería de Cultura, Política Llingüística y Deporte despliega un plan d’acción p’avanzar na internacionalización de la industria cultural asturiana al traviés de la representación autonómica n’Europa Creativa y la participación d’artistes asturianos n’eventos d’impactu global como la Feria d’Arte de Shanghái, el Festival Intercélticu de Lorient o la Feria del Llibru de Guadalajara, en Méxicu.
La conseyera Vanessa Gutiérrez compareció esta tarde, a pidimientu propiu, na Xunta Xeneral del Principáu d’Asturies pa esponer el programa de gobiernu del so departamentu. Les llinies maestres que guíen l’acción del so área tán centraes nel diálogu permanente colos sectores de la cultura y el deporte al traviés de midíes, defendió la conseyera, pa «garantizar los derechos culturales de los asturianos y asturianes, con vocación de serviciu públicu y cola disposición al diálogu basáu na escucha atenta».
Gutiérrez destacó’l trabayu conxuntu colos sectores. Llabor que s’articula al traviés de dellos foros «pa favorecer la puesta en común de los diferentes axentes que los componen». Nesti sentíu, la conseyera mencionó les meses sectoriales que yá fueron convocaes, como la del Deporte practicáu por Muyeres o la de Cultura Tradicional.
- Internacionalización de la industria cultural asturiana
«Asturies va asistir per primer vez a la Feria d’Arte de Shanghái de la mano del Institutu Cervantes», anunció Vanessa Gutiérrez. La representación asturiana que’l Gobiernu d’Asturies va exhibir na feria que se va celebrar el próximu mes de payares na ciudá china va tar comisariada pol artista multidisciplinar Ramón Isidoro.
La presencia asturiana en Shanghái va ser posible gracies a la collaboración del Executivu asturianu col Institutu Cervantes, organismu que va tresformase, coincidiendo con eses feches y na mesma urbe, una estación de metro nuna galería d’arte. Nesti casu, va ser el Muséu de Belles Artes d’Asturies el que ceda la reproducción de delles obres de Sorolla pa una esposición tan anovadora.
Estes acciones culturales nel esterior súmense a les previstes esti añu pola Conseyería de Cultura pa, como indicó Vanessa Gutiérrez, «salvaguardar, desenvolver y promover la diversidá y el patrimoniu cultural y llingüísticu» al la vez que «incrementa la competitividá y el potencial económicu de los sectores culturales y creativos». Nel bieniu 2024-2025, Asturies va asumir la representación autonómica nel comité de xestión intergubernamental d’Europa Creativa, «l’emblemáticu programa de la Comisión Europea p’apoyar a los sectores cultural y audiovisual», destacó Gutiérrez.
Al tiempu, nel capítulu d’internacionalización de la cultura asturiana ocupen un llugar relevante tanto’l Festival Intercélticu de Lorient, en Francia, como la Feria del Llibru de Guadalajara, en Méxicu, onde la Conseyería de Cultura va impulsar la presencia asturiana.
- Recuperación y protección del patrimoniu cultural
La declaración de la cultura minera, la danza d’Asturies y les mazcaraes d’iviernu como Bien d’Interés Cultural (BIC) inmaterial son oxetivos que persigue’l departamentu de Vanessa Gutiérrez, que confía «plenamente nel reconocimientu de la UNESCO a la cultura sidrera asturiana como bien de Patrimoniu Mundial».
L’apoyu del Gobiernu d’Asturies a la recuperación y preservación del patrimoniu cultural refléxase nes inversiones yá en marcha, por exemplu, nel Monesteriu de Santa María de Vilanova, con 1,2 millones d’euros; na ilesia de Santolaya de la Lloraza o en Santa María del Naranco. Unes actuaciones que s’unen a la «planificación exhaustiva» realizada cola «cultura castreña, el prerrománicu, el patrimoniu etnográficu o’l Camín de Santiago», detalló la conseyera, y anticipó un métodu similar pal románicu y el patrimoniu industrial.
- Estudiu sobre la Industria Cultural nel Principáu
La industria cultural asturiana ye una pieza relevante del engranaxe económicu del Principáu d’Asturies. Refléxenlo asina los datos del Estudio sobre la Industria Cultural en el Principado de Asturias que la conseyería encargó en 2022 y del qu’acaba publicase’l so resultáu.
La conseyera punxo a disposición de los grupos parllamentarios l’informe que sirvió pa realizar una radiografía del sector y qu’estima en 230 millones d’euros la facturación pola actividá cultural en 2019. Unes cifres que, no que fai al emplegu, tradúcense en 5.799 trabayadores.
Esta información «evidencia la importancia del sector y demuestra la necesidá de contar con datos de manera continuada», detalló Gutiérrez. Por estes razones, Cultura yá encargó una actualización del estudiu.
- Apoyu y escucha al sector cultural
Na comparecencia, la conseyera destacó l’esfuerzu realizáu pol Principáu pa potenciar los circuitos d’Asturies, Cultura en Rede. Esti programa tien pasao de los 188.000 euros invertíos en 2019 a 1.360.000 euros esti añu. En 2023, Asturies, Cultura en Rede desplegó alredor de 1.000 actividaes pelos conceyos pequeños y medianos de la comunidá autónoma. Y, sobre música, n’abril va celebrase la primer muestra dedicada al sector de la industria musical asturiana.
El Principáu multiplicó por 10 les ayudes al sector cultural, que pasaron de los 233.000 euros en 2019 a los 2.293.487 euros en 2024. De la mesma manera, Vanessa Gutiérrez anunció la continuidá de los trabayos pa la creación de la Rede de Teatros, l’Axencia Asturiana d’Industries Culturales y la recuperación de la Filmoteca d’Asturies.
- Deporte
Nes polítiques d’actividá física y deporte, la intersectorialidá ocupa un papel esencial pa garantizar el derechu a la práctica deportiva de toles persones. D’esta forma, la Conseyería va trabayar de manera coordinada con otros departamentos y col interés puestu, ente otros, nel deporte base; el deporte adaptáu; el deporte tradicional, con especial atención a los bolos, y nel deporte practicáu por muyeres.
Sobre’l deporte practicáu por muyeres yá se celebró la primer reunión de la mesa sectorial, pues la igualdá nel deporte ye una política tresversal d’esta Conseyería y del Gobiernu d’Asturies en conxuntu. Per otru llau, Gutiérrez mostró’l so apoyu a los deportistes d’altu nivel y a les federaciones deportives, a los que garantizó l’atención de les so necesidaes.
Nel capítulu de meyores, la conseyera detalló dalgunes actuaciones como l’anovación de la yerba del campu de fútbol del Naranco. Al mesmu tiempu, la titular de la Conseyería subrayó que tán trabayando na segunda fase de la Estación de Payares, na recuperación del área recreativa de Pénjamo, la modernización de los centros de tecnificación de Tresona y d’El Cristo, asina como na próxima licitación de la reforma integral del refuxu de Brañagallones.
- Normalización llingüística
«La oficialidá del asturianu ye un oxetivu irrenunciable pa esti Gobiernu», esplicó Vanessa Gutiérrez na Xunta Xeneral. Por esa razón, aseguró que van continuar reclamando al Estáu igualdá de tratu coles llingües cooficiales y que reconoza la especialidá docente de los profesores de llingua asturiana.
Nel desenvolvimientu de les polítiques específiques de promoción y normalización llingüística destaca, amás de les ayudes, l’apertura del nuevu traductor Eslema y la puesta en marcha de permios lliterarios y d’artes escéniques, a los que se van sumar nesti 2024 los gallardones d’asturianada y de guiones.
- Avances llexislativos
La conseyera treslladó a los diputaos autonómicos los avances normativos desenvueltos pol so equipu nos primeros meses de gobiernu y que tienen que ver con normes propies como son la futura llei de Biblioteques, la llei de Museos, la llei d’Archivos, la llei del Muséu de Belles Artes y la modificación de la llei d’Usu y Promoción del Asturianu.
