El Gobiernu d’Asturies va invertir 1,28 millones de fondos europeos pa impulsar un proyectu pioneru que promueve la inclusión social y llaboral de persones en situación vulnerable. Tratase d’una de les nueve iniciatives innovadores escoyíes pola Comisión Europea en tol territoriu comuñal pa recibir financiamientu del Programa Européu d’Empléu ya Innovación Social y l’única que se va desenvolver en tol territoriu estatal.
El proyectu Xeitu – Estrategias innovadoras para la inclusión activa a través de partenariados locales integrados va implantase de forma piloto en Tinéu, Mieres y Xixón, onde va beneficiar primeramente a 500 persones, pa estendelo dempués a too Asturies si s’algamen los oxetivos propuestos.
La conseyera de Derechos Sociales y Bienestar, Melania Álvarez, presidió güei la xunta telemática d’entamu del plan, que’l so plazu d’execución establecióse en 30 meses, polo que va rematar en xunu de 2024. Mientres esi períodu, les persones participantes van disponer de recursos nel ámbitu de la renta, la busca d’empléu y l’accesu a bienes y servicios pa superar les barreres que torguen el so insertamientu llaboral.
Asturies, al traviés de la Conseyería de Derechos Sociales y Bienestar, va liderar esta acción, na que tamién participen el Serviciu Públicu d’Empléu (Sepepa), l’Institutu de Desenvolvimientu Económicu (Idepa), el Ministeriu d’Inclusión, Seguridá y Migraciones, los conceyos de Tinéu, Mieres y Xixón, la European Social Network, Cruz Roja Asturies, la Federación Asturiana d’Empresarios (Fade) y la Rede Europea de Llucha contra la Probeza y l’Esclusión Social (EAPN-Asturies).
El trabayu persigue un cambéu de paradigma nel enfoque actual de les distintes organizaciones implicaes, que van operar de manera coordinada y centraes nes necesidaes de los participantes pa consiguir la inclusión. El proyectu va beneficiar a mediu millar de persones perceptores de rentes mínimes (salariu social o ingresu mínimu vital) que cobren l’ayuda dende va tiempu o qu’encaren series dificultaes p’aportar a un puestu de trabayu. Tamién van poder tomar parte persones alloñaes del mercáu llaboral por diverses razones y que nun perciben rentes mínimes.
El Gobiernu d’Asturies espera resultaos a trés niveles:
- Una meyora significativa de les condiciones de vida de les persones participantes, inclusive la so incorporación social y llaboral completa.
- L’aumentu de la calidá de les intervenciones pa la inclusión por aciu una acción coordinada, lo que va contribuyir tamién a aumentar la sostenibilidá del sistema autonómicu de derechos sociales.
- El refuerzu de la cohesión social y la resiliencia de tola sociedá asturiana.
