El Gobiernu d’Asturies considera que l’autoconsumu d’enerxía ye unu de los ámbitos que van contribuyir a impulsar el procesu de transición enerxética rexonal. Asina figura nos borradores de la Estratexa de Transición Enerxética Xusta y de la Estratexa de Rehabilitación Enerxética, anguaño n’información pública, nos que se recueye que la producción pa consumu propiu va tener una función importante tanto nel sector industrial y de servicios como nel ámbitu domésticu y nel parque d’edificios públicos, de la que va ayudar a combatir la probeza enerxética.
Dambos documentos, que tomen como referencia’l diagnósticu realizáu pola Comisión Mista pa Evaluar l’Impactu de la Transición Enerxética n’Asturies, planteguen que l’autoconsumu puede dexar un aprovechamientu meyor de los recursos enerxéticos locales y amenorgar la dependencia enerxética de la industria, reduciendo l’efectu de les fluctuaciones de precios nos mercaos internacionales.
Ente otres opciones, embaraxen que les instalaciones de coxeneración puedan ser sustituyíes por otres d’eficiencia alta qu’ameyoren l’aprovechamientu del calor útil y l’autoconsumu eléctricu. Tamién identifiquen la posibilidá de desenvolver proyectos conxuntos d’aprovechamientu de calores residuales y autoconsumu compartíu nos polígonos industriales.
No que fai al ámbitu residencial y de les alministraciones públiques, dambes estratexes suxuren la creación de comunidaes locales pal desenvolvimientu del autoconsumu y la compra conxunta d’enerxía. Amás, de cara a amenorgar la vulnerabilidá social, proponen que los autoconsumidores públicos o privaos puedan compartir l’escedente de la so xeneración con domicilios vulnerables.
Cola mira de promocionar l’autoconsumu, la Comisión d’Urbanismu y Ordenación del Territoriu del Principáu (CUOTA), dependiente de la Conseyería de Mediu Rural y Cohesión Territorial, anunció’l mes pasáu que los paneles fotovoltaicos que s’asitien en suelu non urbanizable (sobre’l qu’esti órganu exerce la so competencia) son una instalación y non un material de cubrición, polo que, a falta d’una regulación espresa, nun han cumplir les condiciones estétiques que la normativa urbanística esixe pa determinaes cubiertes. Esta decisión va facilitar notablemente la implantación d’estos paneles. Paralelamente, el Gobiernu d’Asturies trabaya n’otres acciones de simplificación alministrativa.
4.228 quilovatios de potencia instalada
N’Asturies, la potencia total instalada d’enerxía fotovoltaica a 31 de xineru yera de 4.228 quilovatios nun total de 844 instalaciones. D’ellos, 3.187 (202 instalaciones) correspuenden con equipos p’autoconsumu. Ye menester destacar que nel 2017 namás había 5 instalaciones, y con poques más se llegó a principios del 2020, añu nel que se produció una crecedera esponencial que s’espera siga agora. Nos primeros 5 meses del 2021 yá se tramitaron tantes instalaciones como en tol exerciciu pasáu.
Per otra parte, Asturies va recibir 12.004.908 euros procedentes del Ministeriu pa la Transición Ecolóxica y el Retu Demográficu pa la convocatoria de cinco llinies d’ayudes empobinaes al fomentu del autoconsumu. D’elles, 3 llinies por valor de 10.940.959 euros van dir destinaes a instalaciones nueves d’autoconsumu anovable eléctricu, mentes que’l restu va dir en dos llinies específiques d’incorporación d’almacenamientu a instalaciones d’autoconsumu yá esistentes, col fin d’optimizar el so rindimientu y eficiencia. Estes cuantíes podríen incrementase a midida qu’escosen los fondos disponibles.
