La Conseyería de Cultura, Política Llingüística y Deporte sigue dando pasos pa reconocer la cultura minera asturiana como Bien d’Interés Cultural (BIC) de calter inmaterial. La conseyera, Vanessa Gutiérrez, axuntóse güei con José Luis Alperi, José Luis Fernández Roces y Fernando Fernández, representantes del SOMA-FITAG-UXT; con Jorge Muñiz, director de la Cátedra de la Cultura Minera; y con Cristina Cantero, directora del Muséu de la Minería y de la Industria, p’analizar l’estudiu técnicu y hestóricu que va sirvir de base pa incoar l’espediente de protección d’esti legáu fondamente vinculáu a la historia, la sociedá y l’identidá d’Asturies.
Mientres l’alcuentru revisáronse los meyores del estudiu sobre la cultura minera y encetáronse los próximos pasos pa la tramitación del espediente BIC. La conseyería impulsó nel 2025 la creación de la Cátedra de la Cultura Minera, en collaboración cola Universidá d’Uviéu, col oxetivu, ente otros, d’ellaborar l’informe técnicu que va encontar la declaración. Esta iniciativa parte d’una propuesta promovida por SOMA-FITAG-UXT y sofitada por diversos conceyos.
El Principáu destina 60.000 euros al funcionamientu de la cátedra ente 2025 y 2028. El proyectu cunta amás cola collaboración del MUMI y HUNOSA, entidaes dedicaes al caltenimientu y espardimientu del patrimoniu mineru. Más allá de les conocencies y práctiques vinculaos a l’actividá extractiva, l’estudiu analiza les formes de convivencia surdíes alredor del movimientu obreru, el llinguaxe propiu del sector, la música, los rituales, les celebraciones, la memoria del trabayu y valores como’l compañerismu, la fraternidá y la solidaridá tresmitíos de xeneración en xeneración.
La memoria esamina, con criterios históricos, técnicos y xurídicos, espresiones representatives d’esti patrimoniu como la festividá de Santa Bárbara, el Coru Mineru de Turón, la Brigada Central de Salvamentu Mineru o los concursos d’entibadores. L’informe encóntase na esperiencia de les persones y comunidaes mineres y acredita la pervivencia de conocencies, práctiques, rituales, espresiones culturales y formes de convivencia que siguen tresmiténdose y recreándose na actualidá. La memoria conclúi que les manifestaciones estudiaes caltienen una sólida continuidá histórica, un fondu enraigono social y capacidá de tresmisión. Por ello, considera especialmente necesaria la so salvaguarda énte’l pasu del tiempu, el progresivu descensu de l’actividá extractiva y la desapaición de los que fueron protagonistes directos y depositarios d’estes conocencies y formes de vida. Nesta llinia, el MUMI y la Cátedra de la Cultura Minera yá empecipiaron acciones conxuntes pa caltener los oficios vinculaos a la entibación.