El gobiernu d’Asturies decidió rescindir unilateralmente el contratu cola Unión Temporal d’Empreses (UTE) axudicataria de l’ampliación y reforma del Hospital Universitariu de Cabueñes énte los retrasos qu’acumulen les obres: hasta agora, namás certificáronse 20 millones de los 79 nos que s’axudicaron los trabayos.
Énte estos incumplimientos, el gobiernu d’Asturies resolvió’l contratu, dempués de comunicar reiteradamente a la empresa la esmolición pola lentitú na marcha de l’actuación ya incoar un espediente alministrativu’l 6 de febreru de 2024 pa la imposición de penalidaes na demoranza. L’espediente arreglóse’l pasáu 27 d’avientu cola imposición d’una penalidá.
Salú esixó en numberoses ocasiones a la empresa, al traviés de los procedimientos alministrativos inherentes a los retrasos, que cumpliera los plazos establecíos, dada la necesidá de cuntar cuanto antes con un centru hospitalariu de referencia pal área V, más modernu y actualizáu.
La decisión de la conseyería obedez a la obligación de velar pol cumplimientu de la llegalidá, el bon usu de los recursos públicos y la defensa de los intereses de la ciudadanía. Tamién pretende amenorgar l’impactu de les demorances y dotar a la área sanitaria, nel menor tiempu posible, d’un hospital más ampliu, afayadizu, funcional y tecnolóxicamente más avanzáu.
El personal técnico de la Conseyería de Salú va ponese a trabayar de manera inmediata na redacción d’un nuevu proyectu d’obres que va incluyir la parte de l’ampliación contemplada nel contratu cola UTE qu’inda nun s’executó. Amás, esi proyectu va incorporar tamién delles meyores n’innovación y la determinación de los procesos señalaos nel documentu anterior como zones grises –espacios pendientes d’executar hasta la definición de les sos funciones- como son les árees de llaboratoriu, farmacia, esterilización y hemodiálisis.
Salú pretende definir esi proyectu nel menor tiempu posible pa sacalo a llicitación darréu, nesti mesmu añu. La dotación económica pa esta actuación ta garantizada colos 42 millones recoyíos nel presupuestu autonómicu de 2025 pa l’ampliación del hospital.
