El Grupu Municipal Socialista del Conceyu de Xixón pide oficialmente esplicaciones a l’actual alcaldesa al respective del so pactu con Vox en materia d’igualdá. Les y los conceyales unviaron un escritu a Carmen Moriyón nel que soliciten una copia de los alcuerdos alcanzaos pa conformar gobiernu ya información sobre qué aspectos concretos de la Ordenanza d’Igualdá ente Muyeres y Homes van ser revisaos al considerar que xeneren desigualdá ente persones, tal que recueye’l documentu robláu cola ultraderecha.
El voceru socialista, Luis Manuel Flórez ‘Floro’, recuerda qu’agora ta poniendo en cuestión una ordenanza a la que l’anterior corporación, incluyíu’l so partíu y a escepción precisamente de Vox, dio lluz verde primeramente’l pasáu 20 d’abril.
Cabo señalar que Carmen Moriyón, nel alderique entamáu pol Conseyu de Muyeres el día 22 de mayu, manifestó que se llevara munchos aprendizaxes estrayíos del feminismu al so puestu de trabayu nel ámbitu sanitariu dempués de la so primer etapa como alcaldesa y que si fuera escoyida nuevamente volvería acutar les competencies en materia d’igualdá.
Énte’l cambéu d’opinión materializáu sobre’l papel p’alzase nuevamente como alcaldesa y qu’afecta al exerciciu de los derechos ciudadanos de más de la metá de la población del conceyu, ye urxente que Moriyón esclarie públicamente toes estes cuestiones y que concrete cuálos de los nueve capítulos y 62 artículos que formen la Ordenanza son contrarios al so programa, a les sos polítiques o a les sos idees tres les conversaciones que caltuvo cola ultraderecha.
