El Muro va perder un tercer carril pal tráficu. El Conceyu de Xixón anunció ayeri’l pieslle del carril izquierdu de l’avenida de Rufo García Rendueles, sentíu Piles, p’asitiar n’él el carril bici. Los conceyales de Movilidá y Obres Públiques, Aurelio Martín y Olmo Ron, respectivamente, presentaron el conxuntu de midíes derivaes de la crisis sanitaria de la Covid-19. «Puen responder tamién a un nuevo modelu de ciudá»; afirmó Martín.
Amás, va crease un corredor piatonal que va comunicar Begoña cola Plazuela y la sablera de San Llorenzo mediante la piatonalizacón de les cais Ruiz Gómez y Caridad. Trátase d’una midida que va permitir «garantizar un tránsitu piatonal seguru», señaló Ron. Los aparcamientos que se van perder por estos trabayos van recuperase nes cais Eladio Carreño y Marqués de Casa Valdés. Ún de los oxetivos del equipu de Gobiernu ye «pacificar los accesos a los centros escolares de Xixón». Pa ello, va llevase alantre nueves piatonalizaciones y supresión d’aparcamientos na redolada de colexos de tola ciudá.
Tamién se va actuar nel carril bici de Poniente. L’equipu de gobiernu plantegó un cambéu de sentíu na cai Mariano Pola nel tramu dende l’edificiu de los antiguos xulgaos hasta la rotonda. Esti vial pasará d’esta manera a dar serviciu esclusivamente a los garaxes de los edificios. Amás, nesti espaciu van suprimise les plazes d’aparcamientu p’asitiar un carril bici que va sustituyir al de Poniente nesta zona.
