El Muséu Arqueolóxicu d’Asturies va acoyer del 29 al 31 de marzu unes xornaes científiques al rodiu de la batalla de Cuadonga y la figura de don Pelayo. La esposición Cuadonga 722-2022. Les buelgues y los relatos van ser el fiu conductor del alcuentru, nel que van participar nueve de los miembros del comité asesor de l’amuesa xunto colos sos dos comisarios: María Antonia Pedregal y César García de Castro.
Les xornaes van tar abiertes al públicu interaesao y l’accesu va ser llibre y gratuitu. Les persones que quieran recibir un certificáu d’asistencia tendrán de formalizar primeramente la so inscripción nel mesmu Muséu Arqueolóxicu, al traviés del teléfonu 985208977 o del corréu electrónicu @museoarq@asturias.org.
El programa inclúi nueve conferencies, trés meses redondes y visites empuestes polos especialistes a la esposición. Los nueve espertos participantes son miembros del comité científicu qu’asesoró a los comisarios de l’amuesa na ellaboración de conteníos y la selección de pieces. L’alcuentru va axuntar a especialistes en cerámiques, numismática o armamentu que desenvuelven el so llabor como profesores universitarios, conservadores de museos, investigadores o arqueólogos.
La retrospectiva, que puede visitase nel Muséu Arqueolóxicu hasta’l 9 d’abril, axunta más de 140 pieces procedentes de 21 instituciones culturales y museos de tol país que conformen una colección única de testimonios sobre’l contestu arqueolóxicu qu’arrodió la guerra. Trátase de l’amuesa temporal más ambiciosa entamada pol Arqueolóxicu desque ocupa la so actual see, pola relevancia, amplitú y variedá de los elementos espuestos y el númberu d’entidaes collaboradores.
