El Muséu Arqueolóxicu d’Asturies trabaya yá nun proyectu de reordenación completa de les colecciones medievales de la so esposición permanente promovíu pola Dirección Xeneral de Cultura y Patrimoniu. La directora del equipamientu, María Antonia Pedregal, anunció güei esta midida nuna comparecencia na Xunta Xeneral del Principáu.

Esta iniciativa, qu’afecta a l’amuesa montada na planta tercer del edificiu principal, contempla tamién la incorporación como espaciu espositivu de la planta baxa del claustru de San Vicente.

Pedregal adelantró que la sala de la cruxía oriental del claustru, qu’agora acueye una exhibición permanente dedicada al Patrimoniu Mundial de la Unesco, va reconvertise nun centru d’información sobre los Caminos de Santiago n’Asturies, p’allugar una pequena sección de materiales arqueolóxicos rellacionaos cola materia. Pela so parte, l’espaciu espositivu de la planta tercer va ampliase pa incorporar pieces d’interés.

La directora del Arqueolóxicu señaló tamién que la renovación “va afectar sustancialmente a los criterios museolóxicu y museográficu, anque se van caltener les llinies xenerales de diseñu y testures visuales y van correxise los defectos conceptual y funcional que l’actual esposición punxo de manifiestu tres 11 años de funcionamientu”.

L’entamu de la execución de les obres del nuevu proyectu museográficu ta previstu pal últimu trimestre d’anguaño y, en paralelu, se procederá a la restauración de les pieces de nueva incorporación.

Esposición sobre la batalla de Cuadonga

Nel intre de la so comparecencia, Pedregal anunció tamién que’l Muséu Arqueolóxicu va entamar una amuesa nel marcu del programa conmemorativu del 1.300 aniversariu de la batalla de Cuadonga denominada Cuadonga 722-2022: les buelgues y los relatos, que va tar abierta al públicu de setiembre de 2022 a abril de 2023.

El proyectu que va rexir el montaxe foi redactáu pol equipu técnicu del muséu, sofitáu nun comité asesor d’ámbitu nacional. L’amuesa va presentar xuna selección significativa del contestu arqueolóxicu del sieglu VIII na península ibérica y la redolada europea, compuestu por armamentu, monedes, elementos de indumentaria o cerámiques d’usu cotidianu. La esposición va complementase con paneles y audiovisuales que dexen al visitante desentrañar les claves al rodiu de la batalla.

Actividaes y visitantes

La directora del muséu recordó que la irrupción de la pandemia amenorgó los 50.144 visitantes rexistraos en 2019 a 14.684 en 2020, y señaló que l’ameyoramientu de la situación sanitaria dexó empezar la recuperación en 2021, con 24.485 usuarios, casi un 40% más que l’añu anterior. La medría notóse particularmente pel branu, especialmente n’agostu, cuando s’algamó un picu de 5.000 visitantes.

Nestos rexistros incidieron negativamente les llimitaciones d’aforu y los cupos de los grupos (llindaos casi tol añu a un máximu de 6 y, más tarde, a 10 persones), según la cancelación d’actividaes complementaries y extraescolares de centros educativos. “Esti enclín previsiblemente va revertir nos meses próximos, a tenor de les numberoses consultes recibíes pal cursu a valir”, precisó Pedregal. En 2021 realizáronse 148 visites de grupos con 1.226 participantes.

Nos últimos meses, el Muséu Arqueolóxicu amontó notablemente la programación d’actividaes y entamáronse numberoses visites empuestes de distinta temática o programaes por cuenta de dalguna celebración, como’l Día del Llibru y el Día Internacional de los Museos. Tamién s’impulsaron conciertos, conferencies, los ciclos de cine del Muséu de Belles Artes y xornaes arqueolóxiques especializaes.

Pedregal destacó l’actu de presentación de la espada de Sobrefoz y les visites temátiques empuestes por el mesmu personal técnicu del muséu mientres los díes siguientes, “que dexaron al públicu conocer a xeitu la nueva pieza espuesta y, de camín, espacios davezu acutaos como’l llaboratoriu de restauración, la biblioteca o parte de los fondos de los almacenes”. Tamién valoró la exhibición del conxuntu de monedes topáu na cueva de La Cuesta (Berció, Grao), y la del legáu de José Manuel González, depositáu pola so familia nel equipamientu.