El Muséu Arqueolóxicu d’Asturies va ufiertar esta seronda una nueva serie de talleres didácticos sobre la vida na Roma antigua, tres l’ésitu de públicu de la primer edición, celebrada en primavera. Nesti marcu, el próximu sábadu, día 21, va celebrase la xornada Ser neños na Roma antigua, destinada a neños y neñes de 6 a 10 años. Les inscripciones pa participar yá tán abiertes.
El ciclu Los romanos y nós, coordináu por Silvia Tantimonaco, investigadora adscrita a la Universidá d’Uviéu, consta de trés talleres empobinaos al públicu infantil y unu p’adultos, qu’analicen distintos aspectos de la vida cotidiana na Roma antigua. El programa cunta con financiamientu de la sección d’Asturies y Cantabria de la Sociedá Española d’Estudios Clásicos.
Tres el del sábadu, el siguiente taller va ser Xuegos de mesa antiguos, dirixíu a públicu adultu y programáu pal 12 de payares. Los más pequenos van poder siguir arriqueciendo la so conocencia sobro esta civilización al traviés de los talleres ¿Qué hora ye en Roma?, el 18 de payares, y Llinternes romanes, programáu pal 2 d’avientu.
Tolos talleres van ser gratuitos y tán llindaos a un máximu de 10 participantes, polo que va ser necesariu acutar plaza llamando al teléfonu 985208977, nel horariu d’apertura del muséu. El plazu d’inscripciones abrirá unos díes primero que se celebren.
