El Conseyu de Gobiernu dio’l vistu bonu a un gastu de 6.176.672 euros pa contratar la segunda fase de les obres d’ampliación del Muséu de Belles Artes d’Asturies, que va consistir na construcción d’un nuevu edificiu amiesto al palaciu de Velarde, na cai Santa Ana d’Uviéu, p’allugar servicios comunes del equipamientu cultural y conectar los dos inmuebles yá esistentes.
Esta actuación va financiase al traviés del Plan Nacional Turísticu Xacobeo 2021-2022, enmarcáu nel Plan de Recuperación, Tresformamientu y Resiliencia, y con fondos propios del Principáu. En concretu, el Gobiernu d’España va apurrir una sovención de 5.884.906 euros, ente que l’Executivu autonómicu va contribuyir colos 291.766 restantes.
Estos trabayos completen el proyectu diseñáu pol arquiteutu Patxi Mangado y que la so primer fase s’inauguró en 2015. Tres l’autorización de gastu, ta previsto que la llicitación empecipie nel mes de payares.
El nuevu inmueble va cuntar con 1.838 metros cuadraos construyíos que se van distribuyir en dos suétanos, planta baxa y trés altores. Nesti espaciu, va allugase un salón d’actos na planta baxa, el taller de restauración d’obres na primera, les oficines y dependencies alministratives nel segundu pisu y, finalmente, na tercer planta, con vistes escontra la catedral, la tienda del muséu y la cafetería.
L’edificiu concíbese como una pieza entemedia que da serviciu a los dos partes esenciales del muséu. Per un sitiu, al palaciu de Velarde, col que se va rellacionar a distintos niveles por aciu pontes creaes al efectu. Por otru, a la primer ampliación, que los sos percorríos espositivos van vese enllargaos tanto na planta baxa -de cuenta que se garantiza l’accesu al salón d’actos dende esta parte del muséu- como na segunda, lo que facilita l’accesu a la cafetería, allugada nel últimu pisu.
El proyectu trata de recuperar, na midida de lo posible, la fachada del palaciu de Velarde, tapada nel so día col agregu realizáu nos años sesenta, que despintó de manera casi íntegra la cara norte y qu’agora se desaniciará.
L’edificiu va disponer d’itinerarios accesibles dende la entrada principal hasta los ascensores, preceptivamente señalizaos, y tolos dispositivos de les zones comunes (interruptores, pulsiadores d’alarma y dispositivos d’intercomunicación) van ser totalmente accesibles.
