Yá ta en marcha’l programa «Tendiendo pontes» pa que les persones mayores usuaries de centros sociales y de sofitu a la integración puedan esfrutar del Muséu de Belles Artes al traviés de distintes actividaes.
Un grupu de 30 usuarios del Centru Social de Mayores El Llano, de Xixón, inauguró güei esti programa d’espardimientu cultural con una visita empuesta a la pinacoteca, diseñada pol departamentu d’Educación del equipamientu. El director xeneral de Promoción de l’Autonomía Personal y Mayor, Enrique Rodríguez Nuño, y el director del muséu, Alfonso Palacio, acompañaron a los asistentes.
El proyectu busca convertir el Belles Artes nun espaciu accesible ya inclusivu, que fomente l’acercamientu a la cultura de persones que, poles sos circunstancies vitales, nun pudieron visitar el muséu o lu perciben como un llugar nel que nun se sienten representaes.
La primer edición del programa va desenvolver hasta avientu y ta prevista la participación de diez centros sociales de mayores y de cuatro centros de sofitu a la integración (CAI), qu’en total suman 500 usuarios. L’oxetivu ye estender de forma paulatina esta iniciativa al restu d’estos equipamientos, con 90.000 asociaos nel casu de los centros sociales y de 1.300 nos CAI, tantu públicos como alcordaos.
Pela so parte, l’equipu del muséu va ufiertar nos centros de sofitu a la integración delles sesiones didáctiques por que les persones usuaries puedan averase al conteníu de la pinacoteca.
Al marxe d’El Llano, los otros nueve centros sociales que van participar nesti programa son los siguientes: Xixón Centro, Arbeyal, Mieres, Pumarín, Cuadonga, La Lluz, Turón, La Pola L.lena y Moreda. Tamién se van beneficiar d’esta iniciativa cuatro CAI: La Unión, Arco Iris, Naranco y Cabueñes.
