En 2009, nel catálogu de la esposición El cartelu n’Asturies: colección del Muséu del Pueblu d’Asturies, que se celebró nel Centru de Cultura Antiguu Institutu (Xixón), Francisco Crabiffosse Cuesta daba noticia de la esistencia d’un cartelu de propaganda braniega realizáu en 1944 a partir d’un concursu públicu fechu pola Xunta Provincial de Turismu d’Asturies. Yera’l primer cartelu turísticu promovíu dende Asturies dempués de la Guerra Civil. La convocatoria esixía que los cartelos presentaos teníen d’utilizar namás cuatro tintes y tener un tamañu de 100 x 62 cm,«pa que quepan nes axencies de viaxes d’España y del estranxeru y nes oficines d’información de la Dirección Xeneral de Turismu y siguiendo lo axustao pol alcuerdu internación de la Unión d’Órganos Oficiales de Propaganda Turística» (BOE 25/04/1941). Esixíase que’l tema fuera «simbólicu», nun pudiendo reproducise llugares o monumentos identificables, y tenía qu’acompañase del lema: «Asturies, veraneo ideal». Axustábase un únicu premiu de mil pesetes, pudiendo la Xunta adquirir otros cartelos ensin premiar, que seríen reproducíos en tarxetes postales y sellos. El cartelu que llogró’l premiu d’esti concursu n’abril de 1944 foi’l presentáu por Conrado Catalá, con casa en Xixón.
Per otra parte, gracies a la Memoria de 1944 de la Xunta Provincial del Turismu d’Asturies», editada en 1945, sábese qu’a esti concursu presentáronse 18 cartelos y que la comisión encargada dio’l premiu al cartelu presentáu col lema «Sol», que yera’l de Conrado Catalá. «D’ésti cartelu realizáronse n’Artes Gráfiques S. A., de Xixón, una tirada de mil exemplares, encargándose de la so distribución pol territoriu nacional la Dirección Xeneral de Turismu y la secretaría de la Xunta Provincial. Col fin de fomentar ente los artistes esta clase de trabayos, la Xunta nun adquirió nengunu más de los cartelos presentaos al concursu, proponiéndose volver convocar otru concursu de cartelos del mesmu tipu nel añu próximu».
Esto yera lo que se sabía d’esti cartelu de 1944, pero d’él nun se conocía nengún exemplar, nin siquier una imaxe.
Agora, el Muséu del Pueblu d’Asturies adquirió esti cartelu pa la so colección gracies a Francesc Prats, de Tremp (Lleida), que lo alcontró en Madrid. El so estáu de caltenimientu ye bien bonu. Trátase d’un cartelu con un dibuxu de llinies cencielles, qu’entronca con ciertu cartelismu de los años trenta, y una temática llindada a una imaxe simbólica, pos como se pidía nes bases del concursu nun podía identificase con un llugar concretu. Esa imaxe simbólica d’Asturies identifícase con una figura femenina vistida d’asturiana y calzada con madreñes, que ta dando de comer a unos pitinos o pollos, y con trés elementos representativos del paisaxe asturianu: el monte y l’horru. Esta identificación d’Asturies con una muyer vistida d’asturiana y un paisaxe verde de montes y horros va tener un llargu percorríu na propaganda turística y nes tarxetes postales del sieglu XX. El cartelu atiense a les bases de la convocatoria: cuatro tintes; midíes de 100 x 62 cm y el lema: «Asturies. Veraneo ideal». Lleva la firma del autor, Catalá, y los nomes del editor: la Xunta Provincial del Turismu d’Asturies, y l’imprentador: Artes Gráfiques S. A., de Xixón.
Esti cartelu súmase a la colección que caltien el muséu de cartelos murales de promoción turística d’Asturies, qu’anguaño son trenta, y tomen dende les primeres campañes del Patronatu Nacional del Turismu en 1929 hasta los primeros cartelos realizaos pol Gobiernu d’Asturies en 1984. El autores son Joaquín Vaquero, Mariano Moré, Alfonso, Teodoro Delgado, Morell, Gomila, etc. Son una amuesa imprescindible de la imaxe que quixo vendese d’Asturies y del trabayu de dalgunos de los meyores ilustradores asturianos y españoles.
Les Xuntes Provinciales y Locales de Turismu fueron creaes en febreru de 1941, recuperando la iniciativa del Patronatu Nacional de Turismu, que se fundó en 1928 y caltúvose mientres la segunda República Española. Les Xuntes de Turismu creáronse en toles capitales de provincia y nes localidaes, qu’ensin ser capitales, fueren declaraes d’interés turísticu pola Dirección Xeneral de Turismu. Estes Xuntes taben integraes por representantes políticos y del sector turísticu, financiábense coles aportaciones o svenciones de diputaciones provinciales, conceyos y entidaes rellacionaes colos sos fines, y coles aportaciones de la Dirección Xeneral de Turismu, y teníen de contribuyir a sufragar los gastos de les oficines d’información de turismu de dicha dirección xeneral. Unu de los sos cometíos foi la edición de cartelos de propaganda turística.
