Una nueva obra pasó a engrosar la colección de cartelos del Muséu del Pueblu d´Asturies. Tratase d’un cartelu de promoción turística d’Asturies realizáu hacia 1955 por Alfonso (Alfonso Iglesias López de Vivigo, Navia, 1910-Uviéu, 1988), por encargu de la prestixosa compañía de viaxes Wagons Lits / Cook. La impresión del cartelu realizóse en Madrid, na Imprenta y Litografía d’Ernesto Catalá, empresa fundada en 1830. Les sos midíes son 100 x 70 cm.
Esta obra ye singular por dellos motivos. En primer llugar polo que significa na recuperación d’esa proyección esterior pa atraer al turismu européu a Asturies, siguiendo les pautes entamaes nos años venti na serie de cartelos turísticos diseñaos por artistes como Vaqueru Palacios, Moré y otros. Esa recuperación de ciertu cosmopolitismu caltiense mientres la Guerra Civil coles llamaes “Rutes de Guerra”, qu’atraxeron fundamentalmente a viaxeros ingleses. Agora, nestos mediaos del sieglu XX, la compañía Wagons Lits / Cook, qu’abriere una axencia n’Uviéu, contemplaba Asturies como una ufierta capaz d’atraer otra vuelta al turismu estranxeru, y de ende l’encargu d’esti cartelu, que de xuru tuvo ediciones en llingua francesa ya inglesa.
La otra particularidá d’esti cartelu d’Alfonso ye la so orixinalidá nel diseñu, qu’acota una vegada más la cualidá del artista pa encarar con ésitu les más diverses temátiques; unes dotes que lo amuesen como’l más versátil y llamativu artista gráficu de postguerra n’Asturies.
La última singularidá d’esti cartelu ye que nun se documenta en nengún de los catálogos publicaos hasta la fecha n’España, y por ello podemos afirmar que ye dafechu inéditu. Foi alcontráu nuna galería de Nueva York especializada en cartelos.
Esti cartelu sumase a otros dos de promoción turística d’Asturies fechos por Alfonso, que fueron encargaos pola Xunta Provincial de Turismu d’Asturies hacia l’añu 1945 y que caltien el Muséu del Pueblu d’Asturies, y a otros trece cartelos que tien el muséu sobre este mesmu asuntu, realizaos ente 1929 y 1983 por artistes como Joaquín Vaqueru, Mariano Moré, Teodoro Delgado o Juan Gomila. Estos cartelos esibiéronse’l pasáu branu nel Muséu Nicanor Piñole na esposición «Asturies, guapura categórica. Cartelos pal turismu del Muséu del Pueblu d’Asturies».
