El Muséu del Pueblu d’Asturies recibe en depósitu la revista El Valle d’Ayer, editada pola Sociedá Hullera Española ente 1901 y 1908. Esta ye una revista mui rara. Nun esisten colecciones nin siquier exemplares sueltos en nenguna biblioteca, arquivu o muséu de titularidá pública, y ye una revista que nun se cita nunca nos numberosos estudios realizaos hasta agora sobre la sociedá mentada o sobro la esplotación minera na cuenca asturiana del Ayer, d’ende la enorme importancia d’esti depósitu nel MEPA.
El Valle d’Ayer repartíase nes oficines de la Sociedá, nos llugares de trabayu, y nos círculos obreros y sedes de los sindicatos católicos. El so espardimientu yera otra manera de “controlar” a los emplegaos y obreros d’Hullera Española, escoyendo la información escrita que llegaba a les sos manos. La so publicación coincide col apoxéu de la política paternalista promovida pol II marqués de Comillas.
